Kalaga Ntasindikile BaIsraeli
11
1 Umpanga nabuzia bunee: “Ndi Kalaga asindikile bantu bage?” Kilo, aba nunse! Kubuno nu nne tondo nili muIsraeli, wa kibuti kya Abrahamu, wa kilongo kya Benjamina! 2 Kalaga ntasindikile bantu bage bulazi, balingile kumenya. Ndi tamukumenya bukutenda masanzo ku kabamba ka Elia, lukita lwasongede baIsraeli ku Kalaga, bunee: 3 “Mukota beitile balengania bobe, basambwide tusenga twabo twa kayulo; nnenyene nasigede nu bo bakulonda kunita.” a 4 Tondo Kalaga amwakwide buni? “Nibikide bamulume tununu mutubakamo batakomine mazu mabo lwabusio lwa Bali.” b 5 Lingo mu nkungu za kano kaluma, kuli kibombo kyasigala kya sombwedwe mu mponga za Kalaga. 6 Tondo ndi ku mponga, kasi ta ku makitilo lingo; ndi ku bubo songo mponga tazili lingo mponga. 7 Umpanga buni lingo? Bubo bukulonda baIsraeli tababumonine, tondo babo basombwedwe u babumonine, nu bango babikilwe mitima mibibu, 8 anga bwasanzilwe bunee: “Kalaga abakasile mutima utakumenyinina; meiso matakumona ku kampa, nu matuzi matakungwa, aaba nu lelo.” c 9 Nu Davidi atendile bunee:
“Meza mabo mabe itega nu bukila,
Nzila za ku kikitania nu lusungio kubeli!
10 Meiso mabo mabikwe kapilo, bubatanamona lingo,
Nu migongo zabo zikumbame bindi binsania.” d
11 Umpanga nabuzia buno: Ndi beikukile buno bagoe? Kilo, aba nunse! Tondo ku kugoa kwabo, lonio lwabaside baBilongo buno babakwile lugi. 12 Tondo ndi kugoa kwabo kwabede mutali ku kisi, nu kukokoka kwabo kwabede mutali ku baBilongo nti kiziki kikaba mu kusila kwa konibwa kwabo?
Lonio lwa Beteli BaYuda
13 Nkutenda ku beinyuwe baBilongo: kubuno nili musingwa wa baBilongo, naganuna mulimo wane, 14 buno ndi bwakulungana, nibike lugi lwa babo ba mikila zane nu konia bamozi kubo. 15 Kubuno ndi kubikwa kwabo ku ntungo kwabezaga ikulumanino ku kisi, kwitabizibwa kwabo nti kwabe buni, ndi ta kalamo kutuka ku bakuzi?
16 Tondo, ndi matubulo matangi maswagibwa, binsania nubyo nti byaswagibwa. Ndi isina lyaswagibwa nti ntabi zaswagibwa. 17 Tondo ndi ntabi imozi zaketulwa, nu ndi uwe wabezaga muti wa mizeituni wa lubanda, wingizizibwe ku kiziki kyabo nu wagomezie na matongu ma masina makulisia muti wa mizeituni, 18 ntwikake ku kabamba ka ntabi zezo. Ndi wikaka, menya buno ta uwe u gukwekaga masina, tondo masina u makukwekaga.
19 Umpanga wabule bunee: “Ntabi zaketwidwe buno nne ningizibwe.” 20 Bubo buligo; zaketwidwe ku kabamba ka kutakatizia kwabo, nu uwe wemana ku bukatizio bwobe. Ntube na lwikotio, tondo ube na boba. 21 Kubuno ndi Kalaga ntasigile ntabi za bumba, kasi ntanakusiga nu uwe. 22 Lolazi umpanga ku bukali nu ku busoga bwa Kalaga: bukali ku babo bakolokile, nu busoga bwa Kalaga kuguli, ndi wikala nunse mu busoga bubuno, ndi tabubo, uwe nu uwe tondo nti watikibwe. 23 Nu bo bubobubo, ndi tabeikala mu kutakatizia kwabo nti beingizibwe; kubuno Kalaga eli mubibu wa kuvwama kubeingizia lingo. 24 Ndi uwe waketwidwe kutuka ku muti wa mizeituni wa lubanda anga bumba bwage, nu wingizizibwe mu muti musoga wa mizeituni, ku lungo lukita na lukita lwobe, kwitila nunse, embe zezo ntabi za bumba zikwingizibwa mu muti wazo wowenyene wa mizeituni.
Lonio lwa BaBilongo
25 Mibuto zane nsikutunda buno, mwiba keinda kakano, buno munavwa kwikotia ku menge meinyu: kibombo kimozi kya baIsraeli kyabede na mitima mibibu, aaba nu baBilongo basila kwingizibwa mukyo. 26 Nu bubo baIsraeli bansania bonibwe, anga bwasanzilwe bunee:
“Mukuluzi akavwa kutuka ku Sayuni,
Nu akagalukya Yakobo ku kunana kwage.
27 Nu lilino u likaba idagano lyane nabo,
Ganikabatikya bwagi bwabo.” e
28 Nu ku kabamba ka Musagu Musoga, beli basombi ku kabamba keinyu; tondo ku kabamba ka kusombolwa, beli batundwa ku kabamba ka beisibo. 29 Kubuno nkaso nu mubila wa Kalaga tabinavwama kugalukibwa. 30 Nu anga bubo bumwabengile Kalaga wakalazi, nu kano kaluma ku kabamba ka kubenga kwabo, mwakwilidwe kyombo, 31 ububo nu bo bese babenga kano kaluma, buno ku kabamba ka kyombo kimwakwilidwe, bakwilwe nu bo kyombo. 32 Kubuno Kalaga akandile bantu bansania mu kutanza buno akwile bansania kyombo.
Bunene bwa Kalaga Bukwangamia
33 Nkuganagana na kwitila kwa menge nu bumenyinino
bwa Kalaga!
Nsungio zage tazikumenyininwa nu nzila zage
tazikusongololwa.
34 Kubuno nazi wamenyininne makengelo ma Mukota, aba
nazi wabezaga musunguzi wage? f
35 Nazi walingile kukasa Kalaga kena buno
anamusubizia ko lingo? g
36 Kubuno bintu binsania bikutukaga kweli, nu binsania
bili ku magala mage nu bili ku kabamba kage.
Lutanuno lube kweli ku nkiko zitanakuzinda! Amena.