BaIsraeli Basombile Busoga bwa Bukatizio
10
1 Mibuto zane, lutundo lwa mutima wane nu masego mane ku Kalaga ku kabamba ka baIsraeli, u buno bonibwe. 2 Kubuno nkubalongekela buno beli na komanizia kukitila Kalaga, tondo ta ku bumenyinino: 3 kubuno ku kutamenya kwisanana kwa Kalaga, nu ku kulonda kukokomezia kwisanana kwabo bobenyene, tabeisigulizizie ku kwisanana kwa Kalaga; 4 kubuno Kristo u kuzinda kwa mulembe buno unsania wakatizia, nti aganzwa buno eisanana. Lonio Luli ku Muntu Unsania Wakatizia Mukota
5 Kubuno, Musa asanzile bubuno ku kwisanana kukutuka ku mulembe bunee: “Muntu unsania ukakita bubo bukutenda mulembe nti akalama kugo:” 6 Tondo kwisanana kukutuka ku bukatizio kukutenda bunee: “Ntutende mu mutima wobe bunee: ‘Nazi ukabakama kwigulu?’ (bubo bukutenda buno kusigulizia Kristo kunsi). 7 Aba, ‘Nazi ukagela mu muzinga?’” (bubo u bukutenda buno kuyukya Kristo kutuka ku bakuzi). a 8 Umpanga bukutenda buni? “Idagi lili bwigi nobe, mu kanua kobe nu mu mutima wobe.” U lilyo idagi lya bukatizio litukusambalaga. 9 Ndi witabizia na kanua kobe bunee, “Yesu eli Mukota,” nu kukatizia mu mutima wobe buno Kalaga amuyukizie kutuka ku bakuzi, nti ukonibwa. 10 Kubuno muntu akukatizia mu mutima wage nti akwisanana, nu na kanua kage, muntu akwitabizia nu akonibwa, 11 anga bukutenda masanzo bunee: “Na muntu unsania wamukatizia ntakeitibwa na nsoni.” b 12 Kubuno takuli kwengukana gasamba baYuda nu baBilongo, eli Mukota wa bansania nu eli mugumi ku bansania bakumusega. 13 Kubuno na muntu unsania ukasegaga ku izina lya Mukota, nti akonibwa. c 14 Umpanga buni bubanamana wozo u batakatizia? Nu buni bubanakatizia wozo u batongwa kwakusambalwa? Nu buni bubanungwa ndi takuli muntu wampa kubasambalila? 15 Nu buni bunaba basambazi ndi tabasingwa? Anga bwasanzilwe bunee: “Magulu mabo meli masoga, babo bakusambala musagu musoga wa bubobelelo, nu bakusambala misagu misoga za mbogimbogi.” d 16 Tondo ta bansania u banzile wozo Musagu Musoga. Kubuno Isaya akutenda bunee: “Mukota, nazi wakatizizie musagu weitu?” e 17 Umpanga bukatizio bukuvwa ku kungwa musagu: nu kungwa musagu kukuvwa ku idagi lya Kristo.
18 Tondo nkubuzia buno ndi tabongule? Ee buligo, bongule!
“Iyuki lyabo lyabalangenne mu kisi kinsania,
Nu bitondo byabo aaba nu kubasa mu kisi kinsania.” f
19 Tondo nkubuzia buno: Ndi baIsraeli tabamenyine? Musa alingile kutenda bunee:
“Nkababika bantu ba lugi ku bantu beteli kilongo,
Nu na kilongo kiteli na bumenyinino nkamwongia.” g
20 Nu Isaya atendile na bupuka nunse bunee:
“Namonekile na babo batandondaga,
Nidolesizie ku babo batambuzagia.” h
21 Tondo ku baIsraeli: atendile bunee:
“Nalambizie maboko mane musi unsania ku bantu beteli
na lwanzo nu banani.”