Kalaga nu Bantu Basombwede
9
1 Nkutenda bulili mu Kristo, nsikutenda buza, kalenganio kane kakundongekela mu Muuza Wasililila: 2 Nili na kabebe kanene nu mu mutima wane nili na lubaba lutanakusila. 3 Kubuno ninatundile nnenyene buno niswililwe nu kulekanukibwa na Kristo ku kabamba ka mibuto zane, kikanga kyane ku mubili, 4 u babo beli baIsraeli, babo bakubikwa bana, beiya lutanuno, nu malagi, nu mulembe, nu ikumbamino, nu malagano, 5 nu beisingulubo, nu mubo u mwatukile Kristo ku lukita lwa mubili, uli Kalaga gantata ga bitondo binsania, wakasilwe mponga ku nkiko zitanakuzinda. Amena! 6 Ta buno idagi lya Kalaga liseli buliabulia. Kubuno ta bansania ba kibuti kya baIsraeli u beli baIsraeli, 7 nu aba beli ba kibuti kya Abrahamu, bansania tabeli bana bage; tondo kwatendilwe bunee: “Mu Isaka, kibuti kyobe kikamanwa.” a 8 U kutenda buno ta bana ba mubili u beli bana ba Kalaga, tondo bana b'idagano u bakuganzwa anga kibuti. 9 Umpanga, lola kitondo kikino ky'idagano: “Ku nkungu zezo nasubye lingo, nu Sara abute mwana wamulume.” b
10 Aba ta bubo tugu, tondo Rebeka nu we ekezibwe iyimi na wamulume umozi, Isaka tateiswe. 11 (Kubuno bana babezaga tabebutwa nu babezaga tabekita busoga aba bubi, buno makengelo ma Kalaga ma kusombola memane, ta ku kuyanga makitilo, tondo ku lutundo lwa wozo ukumana), 12 Rebeka abwidwe bunee: “Nkula akakitila mwana muto.” c 13 Anga bwasanzilwe bunee:
“Natundile Yakobo tondo nasombile Esau.” d
14 Umpanga tutende buni? Ndi kuli buteisanana ku Kalaga? Kilo, aba nunse! 15 Kubuno abwide Musa bunee: “Nkakua kyombo ku wozo u nkakwila kyombo, nu nkaba na mponga ku wozo u nkakita mponga.” e 16 Umpanga, ndi u bubo, kasi tabukutuka ku wozo ukutunda aba ta ku wozo ukusasia, tondo ku Kalaga ukukua kyombo. 17 Kubuno masanzo makutenda ku Farao bunee: “Nakusakikile ku makengelo buno nilolesie magala mane muguli, nu buno izina lyane lisambalwe mu kisi kinsania.” f 18 Ububo, wozo waakutunda kukwila kyombo nti amukwila kyombo, nu wozo waakutunda kukita mutima mubibu nti amukita mutima mubibu.
Bongoa nu Kyombo kya Kalaga
19 Umpanga wambule bunee: “Kubuni eki azuga lingo? Kubuno nazi unakania kusombola kwa Kalaga?” 20 Ta bubo, ee muntu, tondo uwe uli nazi ukwakania Kalaga? Ndi kituma ky'ibumba kinatenda ku wozo wakibumbile bunee: “Kubuni ku wambumbile bubuno?” g 21 Ndi mubumbi nteli mwangati w'ibumba buno abumbe nalyo kituma kimozi kya lwanzo nu kingo kiteli kya kwanzwa? 22 Nu buni bwa kutenda, ndi Kalaga atundile kulolesia bongoa bwage nu kumenyesia magala mage, eikalide na nkiki nnene bituma bya bongoa byakulumizibwe ku lukuo, 23 nu lingo ndi atundile kumenyesia bugumi bwa lutanuno lwage ku bituma bya kyombo, byalingile kukulumizia kutukila wakalazi buno bibe na lutanuno? 24 U beiswe atumanine, ta bakutuka ku baYuda kankanka, tondo nu bakutuka ku baBilongo nu bo, 25 anga bwatendile mu Hosea bunee:
“Nkamana bantu ba kilongo kyane, babo batabezaga
ba kilongo kyane, nu nkamana mutundwa wane,
wozo utabezaga mutundwa wane.” h
26 Nu ku kiziki kikyo kibabwidwe bunee:
“‘Inyuwe tamuli ba kilongo kyane!’
U gago bakamanwa buno bana ba Kalaga uli mulami.” i
27 Nu Isaya akulaluka n'iyuki ku kabamba ka Israeli bunee: “Aba maganzo ma bana baIsraeli manabede anga misege za kitatenge, tondo zezo nkindi zasigala tugu u bakonibwa. j 28 Kubuno Mukota Kalaga akazindilizia nunse kitondo kyage nu asasie kukikita bubo ga kisi.” k 29 Nu anga bwalingile kutenda Isaya bunee:
“Songo Mukota Kalaga wa mayombo ntatusigide kibuti,
Songo tunabede anga Sodoma,
nu tunalingimanizibwe na Gomora.” l
Musagu Musoga ku BaIsraeli
30 Umpanga tutende buni? Buno baBilongo batayangaga kwisanana, bamonine kwisanana, u kwisanana kukulusibwa ku bukatizio, 31 tondo baIsraeli balondaga mulembe wa kwisanana tabeikide ku wozo mulembe. 32 Ku kabamba kakizi? Kubuno baIsraeli bagulondile, ta ku bukatizio, tondo anga ukutuka ku makitilo: beikukile ku ikozi lya kukikitania, 33 anga bwasanzilwe bunee:
“Lola, nabika mu Sayuni ikozi lya kukikitania,
Nu lwanda lwa kugusia,
Nu muntu unsania ukumukatizia ntakaba na nsoni.” m