Kulama Gamozi na Muuza wa Kalaga
8
1 Umpanga kano kaluma, takuli lusungio lwampa, ku babo beli mu Yesu Kristo. 2 Kubuno mulembe wa Muuza wa Kalamo guli mu Yesu Kristo wankandwide ku mulembe wa bwagi nu lukuo. 3 Kubuno bibyo bitavwamine kukita mulembe kubuno mulembe wabezaga watamba ku kabamba ka bumba bwa bwagi, Kalaga abikitile nu asungizie bwagi mu mubili gaasingile Mwana wage wenyene mu mubili wasusanania na bwagi ku kabamba ka bwagi, 4 buno kwisanana kwa mulembe kuzindilizibwe mutuli, beiswe bakutabanga, ta ku kuyanga bumba bwa mubili, tondo ku kuyanga Muuza. 5 Umpanga, babo bakulama ku kuyanga bumba bwa mubili, bakutunda nunse bitondo bya mubili, tondo babo bakulama ku kuyanga Muuza, bakutunda nunse bitondo bya Muuza. 6 Kwangatwa na makengelo ma mubili kuli lukuo, tondo kwangatwa na makengelo ma Muuza kuli kalamo nu bubobelelo; 7 Kubuno makengelo ma mubili makusomba Kalaga, kubuno tamakwisigulizia ku mulembe wa Kalaga, nu tamanabuvwama aba nunse. 8 Tondo babo bakwangatwa na bumba bwabo bwa bwagi tabanavwama kutananizia Kalaga. 9 Tondo inyuwe, ndi Muuza wa Kalaga wikala mumuli, nti tamukulama ku kuyanga mubili, tondo ku kuyanga Muuza. Ndi muntu umozi nteli na bumba bwa Kristo, wozo nti ta muntu wage. 10 Nu ndi Kristo eli mu muli, mubili nti wakua ku kabamba ka bwagi, tondo muuza eli na kalamo ku kabamba ka kwisanana. 11 Nu ndi Muuza wa wozo wayukizie Yesu kutuka ku bakuzi eikala mu muli, wozo wayukizie Kristo kutuka ku bakuzi alamie lingo mibili za lukuo ku Muuza wage ukwikalaga mu muli.
12 Ububo, mibuto zane, tuli na nsombi, tondo ta ku mubili, buno tulame ku kuyanga bumba bwa mubili. 13 Kubuno ndi mwalama ku kuyanga mubili, nti mwakue; tondo ndi mukwita makitilo ma mubili mu Muuza, nti mwalame:
14 Kubuno bansania bakusondelezibwa na Muuza wa Kalaga, u beli bana ba Kalaga. 15 Nu tamwakatile muuza wa bukobe buno mube lingo na boba; tondo mwakatile Muuza wa kukitwa bana, kugo ukulila bunee: “Abba, a Tatane!” 16 Muuza wenyene akulongekelaga muuza weitu buno tuli bana ba Kalaga. 17 Kubuno, ndi tuli bana, tuli lingo bapieni ba Kalaga, nu bapieni gamozi na Kristo, ndi buli bubo tukusungibwa gamozi nage buno tutanunwe gamozi nage.
Lutanuno Lwavwe
18 Kubuno nkuganza buno mbabazio za kano kaluma tazinalinganibwa na lutanuno lukalolesibwa kutuli. 19 Kubuno, bibumbwa binsania bikulindila na kilemanizio nunse kulolesibwa kwa bana ba Kalaga. 20 Kubuno bibumbwa binsania byasigulizibwe kuba buliabulia; ta ku lutundo lwabyo, tondo ku kabamba ka wozo wabisigulizizie na kilemanizio, 21 buno bibumbwa byobyenyene bikandulwe ku bukobe bwa kubiga buno bibe na kiziki ku bukandulwa bwa lutanuno lwa bana ba Kalaga. 22 Tondo twizi buno aba lelo, bibumbwa binsania bikutongaga nu bikubabalagwa na mbabazio anga za kubuta. 23 Aba ta bibumbwa tugu, tondo iswe nu iswe tondo tubenyene, beli na biguma bitangi bya Muuza, tukutonga mu mitima zeitu nu tukulindila kubikwa bana, u bukuluzi bwa mibili zeitu. 24 Kubuno twonezibwe ku kilemanizio; tondo kilemanizio kikumonekako nti ta kilemanizio lingo, kubuno kikyo kikumonekako ndi kinalemaninwa lingo? 25 Tondo ndi tukulemanina kikyo kitutekumona kukyo, nti tukukilindila na nkiki.
Muuza Wasililila Akutusegela ku Kalaga
26 Ububo lingo Muuza akutukasia mu mutambo weitu; kubuno tatwizi kikyo kitwatunganana kusega mu masego meitu. Tondo Muuza wenyene akutusegela ku masego matutakuvwama kusega; 27 nu wozo ukumona munda mwa mitima, eizi buli makengelo ma Muuza, kubuno akusegela baswagibwa anga bukutunda Kalaga.
28 Nu twizi buno bitondo binsania bikukita mulimo gamozi ku kukita busoga ku babo bakutunda Kalaga, nu ku babo bamaninwe anga buli kusombola kwage. 29 Kubuno babo balingile kumenya, ababikile kutukila wakalazi buno babe kisusania kya Mwana wage, buno Mwana wage abe Nkula munkatini mwa mibuto zage mingi. 30 Nu babo babikile kutukila wakalazi u babo bamanine; nu babo bamanine, ababikile beisanana; nu babo babikile beisanana, u babo baganwine.
Bunene bwa Lutundo lwa Kalaga
31 Umpanga tutende buni ku bitondo bibino? Ndi Kalaga eli ku lulenge lweitu, nazi unatubigana? 32 We utakutizie Mwana wage, tondo amukasenne ku kabamba keitu iswe tubansania, buni bwatanatukasa binsania gamozi nage? 33 Nazi ukasongela basombolwa ba Kalaga? Kalaga u ukubeisanania! 34 Nazi ukabasungia? Kristo akule, kwitila lingo, ayukile kutuka ku bakuzi, nu eli ku kuboko kwa seidume kwa Kalaga, nu akutusegelaga! 35 Nazi ukatulekanukya na lutundo lwa Kristo? Ndi tubebe, aba mbabazio, aba nzala, aba bwela, aba kiziki kibibu, aba bupanga? 36 Anga bwasanzilwe bunee:
“Ku kabamba kobe tukwitwa musi unsania,
Tukubikwa anga mikoko za kuseswa.” b
37 Tondo mu bitondo bibino binsania tukwitila kuba bakindi mu wozo watutundile. 38 Kubuno nizi lebelebe buno aba lukuo, aba kalamo, aba banzelo, aba bangati, aba bitondo bya kano kaluma, aba bitondo bikavwa, 39 aba magala, aba bya kwigulu, aba bya gansi, aba kingo kibumbwa kinsania, takikavwama kutulekanukya na lutundo lwa Kalaga luli mu Kristo Yesu Mukota weitu.