Kalolesio Kamozi Keli mu Isonga
7
1 Mibuto zane, kubuno nkutenda ku bantu beizi milembe, ndi tamwizi buno mulembe ukwangata muntu ku nkungu zeikili na kalamo? 2 Ububo, mukikulu wasongwa akandwa na mulembe ku iba wage ndi eikili na kalamo; tondo ndi iba wage akua, nti akandulwa ku mulembe w'isonga wabezaga wamukanda ku iba wage. 3 Umpanga, nkungu zikili iba wage na kalamo, nu ndi asongwa na ungo wamulume, nti amanwa buno kitazi; tondo ndi iba wage akua, nti akandulwa ku mulembe, nu nti nteli lingo kitazi gaanasongwa n'ungo wamulume. 4 Ububo nu inyuwe mibuto zane, ku mubili wa Kristo, mwakule ku mulembe, buno mube bantu ba ungo, u wozo wayukile kutuka ku bakuzi, buno tukolame biguma ku Kalaga. 5 Kubuno gatwabezaga mu bumba bwa bwagi, ntundo mbi za bwagi zasindikagwa na mulembe zakitile mulimo mu biganza byeitu nu bubo twakolamine biguma bya lukuo. 6 Tondo kano kaluma twakandwidwe ku mulembe, kubuno twakule ku mulembe wozo wabezaga watukanda, buno tukite mu lukita luto lwa Muuza, nu ta mu lukita lwa wakalazi anga bwasanzilwe mu mulembe. Mulembe nu Bwagi
7 Umpanga tutende buni? Ndi mulembe guli bwagi? Kilo, aba nunse! Tondo nsinamenyine misako za bwagi songo takubezage mulembe. Kubuno nsinamenyine ntundo mbi songo mulembe tagutendage bunee: “Ntube na ntundo mbi.” 8 Nu ku kuko kukakizia, bwagi bwamonine kiziki, bwakitile mundi lukita na lukita lwa ntundo mbi; kubuno kuteli mulembe, bwagi nti bwakua. 9 Kundi, wakalazi nabezaga mulami kuteli mulembe, tondo gabasile mulembe, bwagi bwabede lingo na kalamo, nu nne nakule, 10 ububo, ikakizio lyabede buno lilusie kalamo, kundi nti lyalusizie lukuo. 11 Kubuno bwagi, mu kuba bwamona nkungu ku lilyo ikakizio, bwanengelede nu na lilyo ikakizio bwanitile.
12 Kasi mulembe wasililila, nu ikakizio nti lili lyasililila, lisanana nu isoga. 13 Umpanga, ndi bubo bwabezaga busoga buse bwambela lukuo? Kilo, aba nunse! Tondo bwagi bwalusizie lukuo buno bumoneke anga bwagi, ku nzila za bubo buli busoga buno ku lilyo ikakizio, bwagi bwitile kuba bubi nunse.
Muntu Wangatwa na Bwagi
14 Kubuno twizi buno mulembe guli wa Muuza; tondo nne nili muntu wa mubili, wakunzizibwe ku bwagi. 15 Kubuno nsizi bunkukita; kubuno nsikukita nunse bubo bunkutunda kukita, tondo bubo bunkusomba, u bubo bunkukita. 16 Tondo ndi nakita bubo bunsikutunda, nti nitabizia buno mulembe guli musoga. 17 Nu kano kaluma ta nne u gukubukita, tondo bubo bwagi bwikile mundi u bukubukita. 18 Kubuno nizi buno bubo buli busoga tabukulama mundi, u kutenda buno mu mubili wane, nili na lutundo kukita busoga, tondo nsikuvwama kubukita. 19 Kubuno nsikukitaga bubo busoga bunkutunda, tondo nkukitaga bubi bunsikutunda. 20 Nu ndi nkukita bubo bunsikutunda, nti ta nne lingo u gukubukita, tondo bwagi bwikile mundi u bukubukita.
21 Umpanga, kundi namona wono mulembe buno: ku nkungu zinkutunda kukita busoga, bubi nti bwambasila. 22 Kubuno nkubogaboga ku mulembe wa Kalaga, ku muntu wa munda; 23 tondo nkumona ku ungo mulembe mu biganza byane, gukwitana na mulembe wa bumenyinino bwane, nu gukumbika mukandwa wa mulembe wa bwagi guli mu biganza byane. 24 Kabebe kundi! Nazi ukandekanukya na mubili wono wa lukuo?
25 Kalaga asimwe mu Yesu Kristo Mukota weitu! Ububo umpanga, ku bumenyinino bwane nnenyene, nili mukobe wa mulembe wa Kalaga, tondo ku mubili nti nili mukobe wa mulembe wa bwagi.