2 BAKORINTO
Mukanda W'ibili Wasingaga Paulo ku Bakorinto
Kalaga eli Mukasia wa Bantu Bage
1
1 Paulo, musingwa wa Yesu Kristo ku kusombola kwa Kalaga, nu Timoteo mubuto weitu ku kanisa ka Kalaga keli ku Korinto, nu ku basililila bansania beli mu kisi kinsania kya Akaya: 2 mponga zibe kumuli nu bubobelelo bukutukaga ku Kalaga Tateiswe nu ku Mukota weitu Yesu Kristo. 3 Lutanuno ku Kalaga, Isi wa Mukota weitu Yesu Kristo, Isi wa kyombo nu Kalaga wa kubobelezia kunsania, 4 ukutubobelezagia mu mbabazio zeitu insania, buno tubobelezie babo beli na tubebe twa nkita insania ku kubobelezia kutukubobelezibwa na Kalaga. 5 Kubuno anga bwitila mbabazio za Kristo kutuli, ububo nu bo kubobelezia kweitu kwitile ku Kristo. 6 Tondo ndi iswe tuli na tubebe, nti ku kabamba ka kumubobelezia nu ku lonio lweinyu; aba ndi tukubobelezibwa nti ku kabamba ka kubobelezia kweinyu buno mube na magala ma kwikalila mu mbabazio anga butuli nazo. 7 Nu kilemanizio kyeitu kumuli kyakokomena, kubuno twizi buno, ndi muli gamozi n'iswe mu mbabazio, nti muli gamozi n'iswe mu kubobelezibwa.
8 Kubuno mibuto zeitu, tatukutunda mwikale geteli kumenya kitondo kya kabebe kako katwabezaga nako mu Asia, buno twabezaga na bitondo byingi byatulimbigenne nunse kutinga magala meitu nu twakengelaga buno tatunalama lingo. 9 Tondo iswe tubenyene twakengelaga buno twabezaga mu lusungio lwa lukuo. Tondo bubo bwabezaga buno tatwidemanine tubenyene, tondo tulemanine Kalaga ukuyukagia bakuzi. 10 Kubuno wozo u watwoneizie mu lukuo lunene nunse, nu akutonia, buligo buno mweli tukulemanina buno akatonia lingo. 11 Nu inyuwe lingo tukasiazi ku masego buno ku kitondo kya lukaso lulo lutwakasilwe ku masego ma bantu beingi, luganuno lukaswe na bantu beingi ku kabamba keitu.
Paulo Ntendile Lingo ku BaKorinto
12 Kubuno kukuno u kwikaka kweitu, nu bulongeki bwa kalenganio keitu, buli buno twatabangile mu kisi, nu kwitila nunse munkatini mweinyu, ku kusililila nu ku bulili mu mitima zeinyu bukutukaga ku Kalaga, ta ku menge ma bantu tondo ku mponga za Kalaga. 13 Kubuno tatwamusanzide bingo bitondo, umpanga bibyo bimukusoma aba bimwizi, 14 anga bubo bumwasila kutusongolola kyindi buno iswe tukwikakila mu muli anga bumukwikakila mutuli mu busi bubo bwa Mukota Yesu.
15 Nu mu kilemanizio kikino, natundaga kuvwa kumuli tanga, buno mube lingo na mponga, 16 nu natinge kumuli nu kwenda ku Makedonia, nu lingo kutuka ku Makedonia nu kusubya kumuli, nu mwansindikizie ku Yudea. 17 Umpanga ganatundile bubo, ndi nabezaga nkuzangazanga? Aba bitondo binkukengela kukita, ndi nkukengela kubikita ku lukita lwa bumba bwa bantu buno nitende bunee: “Ee, nti ee, nu ta bubo, nti ta bubo.” 18 Tondo anga bwasililila Kalaga, idagi lyeitu kumuli talyabezaga, “Ee nu ta bubo.” 19 Kubuno Mwana wa Kalaga, Yesu Kristo, Wasambwedwe kumuli na nne, nu Silvano nu Timoteo, ntabezaga, “Ee, nu ta bubo,” tondo mweli Musagu uli, “Ee.” 20 Kubuno malagano mansania ma Kalaga mu Kristo meli, “Ee,” nu mweli meli, “Amena,” buno tuganunazi Kalaga. 21 Umpanga Kalaga atulindizie inyuwe gamozi n'iswe mu Kristo, nu atubongezie mwambo, 22 nu We u watubikile kamenyikilo, nu u watukasile kalingilo ka Muuza mu mitima zeitu.