BAGALATIA
Kusambizania
1
1 Paulo, musingwa, ta wa bantu aba wa muntu, tondo wa Yesu Kristo nu Kalaga Isi wamuyukizie kutuka ku bakuzi, 2 nu mibuto insania beli gamozi na nne, ku makanisa ma ku Galatia: 3 mponga nu bubobelelo bibe kumuli kutuka ku Kalaga Isi nu ku Mukota weitu Yesu Kristo, 4 wikasenne wenyene ku kabamba ka bwagi bweitu buno atutikye ku kisi kikino kibi kya kano kaluma anga buli lutundo lwa Kalaga Tateiswe, 5 kweli kube lutanuno ku nkiko na nkiko! Amena! Musagu Umozi Musoga
6 Nangama na bumwasasia kusiga wozo wamumanine mu mponga za Kristo, nu kugaluka ku ungo musagu musoga, wa lungo lukita. 7 Ta kubuno kuli ungo musagu musoga, tondo kuli bantu bakumuzangiazangia, nu bakutunda kugalukya Musagu Musoga wa Kristo. 8 Tondo, ndi iswe tubenyene, aba ndi mwanzelo wa kwigulu es'amusambalila ungo musagu musoga wengukana na wozo u twamusambalide, aswililwe! 9 Anga butwalingile kutenda, nu ku nkungu zeno nkubutenda lingo limbizi lya mabili: Ndi muntu umozi amusambalila ungo musagu musoga wengukana na wozo u mwakatizizie, aswililwe!
10 Nu kano kaluma, ndi bunene bwa bantu u bunikwelama, aba bubo bwa Kalaga? Ndi nkutunda kutananizia bantu? Songo ninatundile kutananizia bantu, songo nsinabede mukiti wa Kristo.
Buni Bwabede Paulo Musingwa wa Kalaga
11 Inyuwe mibuto zane, nkutunda mumenye Musagu Musoga gunasambede taguli lukita lwa bantu. 12 Kubuno nsyagukatile ku muntu aba nsigisizibwe na muntu, tondo ku kulolesibwa kutuka ku Yesu Kristo.
13 Kubuno mungule ku musagu wa misako zane za wakalazi mu mpala za baYuda bunababazagia nu kusungia nunse Kanisa ka Kalaga, 14 nu bunabezaga mutangi mu mpala za baYuda, kutinga beingi ba lugi lwane nu ba mu kilongo kyane, nu kwitila kwa magala mane ku kumenya makitilo ma batatane.
15 Tondo gatananizizibwe Kalaga, wozo wantikizye munda mwa mmane, nu wammanine mu mponga zage, 16 ku kulolesia Mwana wage mundi buno nimusambale munkatini mwa baBilongo, limbizi limozi nsyakalile lwango na bantu beli na mubili aba na mikila, 17 nu nsyabakamine ku Yerusalema ku babo babezaga basingwa lwabusio lwane, tondo nendile yiliyili ku Arabia, kusila nasubizie lingo ku Damasiki. 18 Kumbusa kwa myaka isatu, nabakamine ku Yerusalema kumonana na Kefa, nu nikede kwage bindi ikumi nu bitano. 19 Tondo nsyamonine ku ungo muntu wampa ku baswagibwa, umpanga Yakobo, muto wa Yesu.
20 Bitondo binikumusanzila, nkubitenda lwabusio lwa Kalaga, tabili buza.
21 Nendile lingo ku kisi kya Suria nu kya Kilikia. 22 Tondo, kilungi kyane takyabezaga kizibilwe ku makanisa ma Yudea meli mu Kristo; 23 babezaga tugu bakungwa kukutendwa bunee: “Wozo watusungagia wakalazi akusambala kano kaluma bukatizio bwabezaga akwikasana nunse ku kubusambula,” 24 nu baganwine Kalaga ku kabamba kane.