BAEFESO
Kusambizia
1
1 Paulo musingwa wa Yesu Kristo ku kusombola kwa Kalaga ku baswagibwa beli ku Efeso, nu ku bakatizia mu Yesu Kristo. 2 Mponga zibe kumuli nu bubobelelo bukutukaga ku Kalaga Tateiswe nu ku Mukota Yesu Kristo. Mponga Zatukitide Kalaga mu Yesu Kristo
3 Kalaga aganunwe, Isi wa Mukota weitu Yesu Kristo watukasile mponga insania za Muuza, mu biziki bya Mwigulu mu Kristo. 4 Mweli Kalaga atusombwede gabezaga kisi takibumbwa buno tube basililila nu beteli na bwagi lwabusio lwage mu lutundo. 5 Atusombwede kutukila wakalazi buno tubikwe bana bage mu Yesu Kristo anga buli lutundo lwage lusoga, 6 ku kuganuna kwa lutanuno lwa mponga zage zatukasile buliabulia mu Mutundwa wage.
7 Mweli tuli na bukuluzi mu mikila zage, isigililo lya bwagi, anga bwingi bwa mponga zage 8 zatutalikide nunse Kalaga mu menge mansania nu mu bumenyinino bunsania. 9 Atumenyesizie kakungu ka lutundo lwage anga bwabezaga bwamutananizia mu makengelo mage wenyene. 10 Buno gakakuka nkungu, akakundamania binsania mu Kristo bili mu meigulu nu bili ga kisi.
11 Mweli nu iswe twabe bapieni, kutukila wakalazi twasombwedwe anga bwabezaga makengelo ma wozo ukukita binsania ku lwango lwa lutundo lwage. 12 Buno tube luganuno lwa lutanuno lwage iswe balingile kubika kilemanizio kyeitu mu Kristo.
13 Gamwasilile kungwa ku Musagu wa bulili, ku Musagu Musoga wa lonio, mweli mwakatizizie lingo, nu mwabikilwe kamenyikilo na Muuza Wasililila w'idagano. 14 Muuza Wasililila eli mwima wa bupieni bweitu, ku bukuluzi bwa Kalaga ku bantu bage, nu kuba luganuno lwa lutanuno lwage.
Masego ma Paulo
15 Ku kabamba kako nu nne kutukila ganungule ku musagu wa bukatizio bweinyu mu Mukota Yesu, nu ku lutundo lweinyu ku baswagibwa bansania. 16 Nsikukutwa na kumusima nu nkumutekula mu masego mane, 17 buno Kalaga wa Mukota weitu Yesu Kristo, Isi wa lutanuno, amukase Muuza wa menge, nu wa kulolesibwa mu kumumenya. 18 Bumenyinino bwa mitima zeinyu bwabikilwe kyengi buno mumenye buni buli kilemanizio kya mubila wage, nu buni buli bugumi bwa lutanuno lwa bupieni bwage mu basililila, 19 nu buni buli bunene bwa bupuka bwage kutuli, iswe bakatizia nu bupuka bubuno buli anga kukita kwa magala mage nunse. 20 Amalolesizie mu Kristo gaamuyukizie kutuka ku bakuzi nu kumwikazia ku kuboko kwage kwa seidume nu biziki bya mwigulu, 21 kutinga nunse makota mansania, nu bwangato bunsania, magala mansania, bangati bansania, nu izina n'izina linsania likutekulwa, ta mu nkiko zeno tugu, tondo mu nkiko zezo zavwe, 22 Nu abikile binsania kunsi kwa magulu mage, nu amubikile kuba itoe lya binsania lya kanisa, 23 keli mubili wage, kusililila kwage wozo ukwizazia binsania mu bansania.