Kwekelana Mizigo Bweitubweitu
6
1 Mibuto zane, ndi muntu umozi asangwa mu misako za bwagi, inyuwe beli mu Muuza, subyazi muntu wozo na mutima wabota. Nu nti widanga uwenyene buno unavwa nu uwe kulindikwa. 2 Mwekelane mizigo bweinyubweinyu, nu bubuno nti mwasililizie mulembe wa Kristo. 3 Kubuno ndi muntu umozi akwikengela buno eli kena, nu we nteli kampa, nti akwiyengelela wenyene. 4 Na muntu na muntu alole nunse makitilo mage wenyene, nu nti abe na kitondo kya kwikaka wenyene, nu ta kwidingimania m'ungo muntu. 5 Kubuno na muntu na muntu atunganana kweka muzigo wage wenyene. 6 Wozo ukwigisibwa idagi akase wozo ukumwigisia ku binsania byeli nabyo.
7 Tamwengelelwe: Kalaga ta wa kwililika. Kikyo kikuyika muntu u kyakatubula. 8 Wozo ukuyika ku bumba bwa mubili wage akatubula lukuo; tondo wozo ukuyika ku Muuza, ku Muuza akatubula kalamo katanakuzinda. 9 Tatukutwe ku kukita busoga; kubuno ndi tatwakutwa, nti tukatubula ku nkungu zakuka. 10 Ku bubo, ndi tuli na nkungu, tukite busoga ku bansania, nu kwitila nunse ku mibuto zeitu za mu bukatizio.
Kusungua Kuzinda nu Kusambizania
11 Lolazi lukita lwa masanzo mane manene manamusanzide na kuboko kwane nnenyene. 12 Bansania bakutunda kwibika buno beli basoga ku mubili bakumukakizia kumonesibwa, buno tabasungibwe ku kabamba ka musalaba wa Kristo. 13 Kubuno bamonesibwa bobenyene tabakukokomezia mulembe; tondo bakutunda mumonesibwe buno beikake ku kabamba ka kako kalolesio ku mibili zeinyu. 14 Kundi, nsineiganuna ku kango, umpanga ku musalaba wa Mukota weitu Yesu Kristo, kugo kisi kyatakilwe kundi nu nne ku kisi. 15 Kubuno kumonesibwa ta kena, aba kutamonesibwa; tondo kili kinene u kuba kibumbwa kito. 16 Bubobelelo nu kyombo bibe ku bansania bakuyanga mulembe wono, nu ku baIsraeli ba Kalaga.
17 Kutukila kano kaluma, muntu wampa ntansune, kubuno nili na mikolu za Yesu ku mubili wane.
18 Mibuto zane, mponga za Mukota weitu Yesu Kristo zibe gamozi mu myuza zeinyu. Amena.