Tamuzimizie Bukandulwa Bweinyu
5
1 Kristo atukandwide buno tube nunse bakandulwa. Umpanga, lindazi, nu tamusubye lingo mu kikando kya bukobe. 2 Lolazi, nne Paulo, nkumubula buno ndi mukumonesibwa, Kristo ntabe na mutali wampa kumuli. 3 Nu nkukokomezia lingo kutenda buno, na muntu unsania wamonesibwa atunganana kukita bunsania bwa mulembe. 4 Mwalekanukibwa na Kristo inyuwe bansania bakutunda kwisanana ku mulembe; mwakoloka nu mwatuka mu mponga. 5 Beiswe, ku bukatizio, u tukulindila mu Muuza kilemanizio kya kwisanana. 6 Kubuno mu Yesu Kristo, kumonesibwa, aba kutamonesibwa takuli kena; tondo bukatizio bukukita mu lutundo. 7 Mwendaga lubilo busoga, nazi wamubigenne buno tamwanze bulili? 8 Kulubikania kukuno takwatukile ku wozo wamumanine. 9 “Mugago mukeke ukugagagia binse bitabezaga byagaga.” 10 Nili na kilemanizio kikino kumuli mu Mukota, buno tamube na makengelo ma lungo lukita. Tondo wozo ukumulubikania, aba ndi eli nazi asungibwe. 11 Mibuto zane, ndi niki nasambala lingo musagu wa kumonesibwa, kubuni niki nababazibwa? Ububo ikitano lya musalaba lyasilile! 12 Ninatunda buno babo bakulubikania munkatini mweinyu buno balekanukibwe n'inyu.
13 Inyuwe mibuto zane, mwamaninwe buno mukandulwe; umpanga tamukite bukandulwa bubuno kuba kitondo kya kulama mu ntundo za mubili, tondo ku lutundo mukitilane bweinyubweinyu. 14 Kubuno mulembe wazindilila mu kitondo kimozi: “Tunda munyobe anga buwitunda uwenyene.” 15 Tondo ndi mukutwana nu mukuliana bweinyubweinyu, idangazi buno munavwa kuzikania bweinyubweinyu.
Kusondelezibwa na Muuza nu ta na Ntundo
za Bumba bwa Bantu
16 Umpanga nkutenda buno, sigazi Muuza kumusondelezia nu tamukazindilizia lingo ntundo za mubili. 17 Kubuno mubili eli na ntundo zengukana na zezo za Muuza, nu Muuza eli na ntundo zengukana na zezo za mubili; bakusaka gabasamba buno tamukukita bumukutunda. 18 Ndi mukusondelezibwa na Muuza, nti tamuli lingo kunsi kwa mulembe.
19 Tondo makitilo ma bumba bwa mubili makumonekako meli: butazi, nsese, kwita meiga, 20 kukumbamina nkisi, buganga, lusombo, nsake, lugi, bongoa, myango, kulekanuka, misona, bulundulundu, 21 Musona, kukua na maku, buliagundu, nu bitondo byasusania bibino, nkumukengeleziabyo, anga bunasilile kumukengelezia, buno babo bakukitaga bitondo bya lukita luluno, tabapiene Bukota bwa Kalaga.
22 Tondo kiguma kya Muuza kili lutundo, mbogimbogi, bubobelelo, nkiki, mponga, busoga, bukatizio, kubota, kwisungula; 23 takuli mulembe ku bitondo bibino. 24 Babo beli ba Yesu Kristo batakile bumba bwa mubili gamozi na makengelo mabo mabi, nu ntundo zabo mbi ku musalaba. 25 Ndi tukulama mu Muuza, kasi tutabangazi mu Muuza. 26 Tatulonde kuganunwa kwa buliabulia ku kusunana bweitubweitu, nu ku kutonania.