4
1 Tondo, ndi mupieni eli mwana, nkutenda buno ntengukana na mukobe ku kampa, aba buno eli mukota wa binsania; 2 tondo eli kunsi kwa basozi nu balangi bage aaba nu ku nkungu zabikilwe n'Isi. 3 Bubobubo iswe nu iswe, gatwabezaga tukikili bana, twabezaga kunsi kwa bukobe bwa bitondo bya kisi; 4 tondo gakukile nkungu, Kalaga asingile Mwana wage, wabutilwe na mukikulu, wabutilwe kunsi kwa mulembe, 5 buno akulule babo babezaga kunsi kwa mulembe, buno tube bana. 6 Nu kubuno muli bana, Kalaga asingile Muuza wa Mwana wage mu mitima zeitu, ukulila bunee: “Abba! a Tatane!” 7 Umpanga ntuli lingo mukobe, tondo mwana; nu ndi uli mwana, nti uli mupieni ku mponga za Kalaga. Kabebe Keli na Paulo ku Kabamba ka BaGalatia
8 Wakalazi, gamwabezaga tamumenya Kalaga, mwabezaga bakobe ba tulaga tutabezaga tulaga ku bumba bwato; 9 tondo kano kaluma gamwasila kumenya Kalaga, aba gamwasila kumenywa na Kalaga, kubuni lingo kumukusubya ku bitondo bitaswaga nu bya muzambo, bibyo bimukutunda kukitila lingo? 10 Mukwanza nunse bindi, nu myezi, nu nkiko, nu myaka! 11 Nkukua boba ku kitondo kyeinyu buno, embe mulimo u namukitide tawabede na mutali.
12 Mibuto zane, nkumusega buno, mube anga bundi, kubuno nne nili anga inyuwe. 13 Tamwankitide bubi bwampa. Nu mwizi buno ku kabamba ka lusambo lwa kutamba mubili u kunalingile kumusambalila Musagu Musoga limbizi litangi. 14 Lusambo lwane lwabezaga mu mubili wane lwabezaga idindiko kumuli, tondo tamwalubengile aba kulusomba; tondo mwansekede anga mugenzi wa Kalaga, anga Yesu Kristo. 15 Umpanga kuni kuli mbogimbogi zeinyu? Kubuno nkumulongekela buno, songo bubo bunakulungenne, inyuwe munatikizibwe meiso nu kunkasamo. 16 Kano kaluma, ndi niseli mwiti weinyu na kumubula buli bulili?
17 Lutundo lubeli nalo kumuli taluli lusoga, tondo bakutunda kumulekanukya n'iswe, buno mube na lutundo kubo. 18 Buli busoga kuba na lutundo ku bubo buli busoga nu ku nkungu insania, nu ta ku nkungu zinikile munkatini mweinyu tugu. 19 Bana bane, ku babo bankungwila lingo lubaba lwa kubuta aaba nu gamoneke Kristo mumuli, 20 kano kaluma nkutunda kuba bwigi n'inyuwe, kugalukya iyuki lyane, kubuno nkuzangazanga ku kabamba keinyu.
Kalolesio ka Hagari nu Sara
21 Inyuwe bakutunda kuba kunsi kwa mulembe, ndi tamukungwa buni bukutenda mulembe? 22 Kubuno bwasanzilwe buno, Abrahamu abezaga na bana babili, umozi wa mukikulu mukobe, nu ungo wa mukikulu mutangi. 23 Tondo wozo wa mukikulu mukobe abutilwe ku mubili nu wozo wa mukikulu mutangi abutilwe ku idagano. 24 Bitondo bibino bili kalolesio, kubuno bakikulu babano beli malagano mabili, limozi lya kumo lili lya ku mwiduko wa Sinai likubuta bana ku bukobe, u Hagari. 25 Kubuno Hagari u mwiduko wa Sinai guli ku Arabia walingimana na Yerusalema wa kano kaluma, eli mu bukobe gamozi na bana bage. 26 Tondo Yerusalema wa kwigulu eli mukandulwa, nu eli meiswe. 27 Kubuno bwasanzilwe bunee:
“Bogaboga, mugumba uwe utakubuta!
Laluka n'iyuki lya mbogimbogi,
uwe utongule ku lubaba lwa kubuta!
Kubuno bana ba mukikulu kigilwa
Beli beingi kutinga bana ba wozo kilanga kili n'iba.”
28 Ku inyuwe mibuto zane, anga Isaka, muli bana b'idagano; 29 bubo nu bo ku nkungu zezo wozo wabutilwe ku mubili ababazizie wozo wabutilwe ku Muuza, nu bubo buli lingo aaba nu kano kaluma. 30 Tondo buni bukutenda Masanzo? “Imbia mukobe nu mwana wage, kubuno mwana wa mukobe ntanapiena gamozi na mwana wa mukikulu w'isonga.” 31 Ububo mibuto zane, tatuli bana ba mukikulu mukobe, tondo ba mukikulu w'isonga.