BAGALATIA 3

Mulembe Aba Bukatizio

1 Ee inyuwe baGalatia, bikongolo! Nazi wamulogile buno, tamuyange bulili, inyuwe mwamonine ku meiso meinyu lukita lwatakilwe Yesu ku musalaba. 2 Nkutunda kubuzia kitondo tugu kimozi kumuli; ndi ku makitilo ma mulembe u kumwasekede Muuza Wasililila, aba ku kungwa ku meigisia ma bukatizio? 3 Ndi tamuli nunse na menge ku kitondo kikino? Kusila kwa kulinga na Muuza, ndi mukutunda kano kaluma kusililizia na mubili? 4 Ndi mwababedwe mambizi meingi buliabulia? Ndi lebelebe mbabazio zabezaga buliabulia! 5 Umpanga, wozo ukumukasa Muuza, nu ukukita miganogano munkatini mweinyu, ndi akuzikita ku makitilo ma mulembe, aba ku kungwa meigisia ma bukatizio?

6 “Anga bwakatizizie Abrahamu Kalaga nu bubo bwamubikile kuba wisanana,” 7 umpanga menyazi buno babo beli na bukatizio u beli bana ba Kalaga. 8 Nu masanzo malingile kukengela buno Kalaga akabika baBilongo beisanana ku bukatizio, malingile kusambala wozo musagu musoga ku Abrahamu bunee: “Muguli bilongo binsania bikakaswa mponga!” 9 Kubuno babo bakatizia bakaswe mponga gamozi na Abrahamu muntu wa bukatizio.

10 Kubuno babo bansania bakwikasana ku makitilo ma mulembe beli kunsi kwa kiswililo; kubuno bwasanzilwe bunee: “Aswililwe muntu unsania utakuyanga binsania byasanzilwe mu mukanda wa mulembe, nu utakukitabyo.” 11 Nu bukumonekako buno takuli muntu wampa unaba wisanana lwabusio lwa Kalaga ku mulembe, kubuno bwabwidwe bunee: “Wisanana akalama ku bukatizio.” 12 Tondo mulembe taguli ku bukatizio; tondo gukutenda bunee: “Wozo muntu ukakita na bitondo bibino bya mulembe akalama mubyo.”

13 Kristo atukulwide ku kiswililo kya mulembe, aswilidwe ku kabamba keitu, kubuno kwasanzilwe bunee: “Aswililwe muntu unsania ukukamwa ku muti,” 14 buno mponga za Abrahamu zibe ku baBilongo mu Yesu Kristo, nu buno tukaswe idagano lya Muuza ku bukatizio.

Mulembe nu Idagano

15 Mibuto zane, nkutenda mu lukita lwa bantu, idagano isoga, ndi lyakitwa na muntu, talinatikibwa na muntu wampa, nu muntu wampa ntanalitalikila. 16 Tondo idagano lyakitilwe ku Abrahamu nu ku kibuti kyage, tabyabwidwe bunee: “Nu ku bibuti,” anga ku beingi, tondo “Nu ku kibuti kyobe” bukulolesia muntu umozi tugu, u Yesu Kristo. 17 Nu bubuno u bunkutunda kutenda bunee: Idagano lyasanzilwe na Kalaga, talinatikibwa, buno idagano libe buliabulia, ku mulembe wabasile kumbusa kwa myaka nkama inazi nu makumi masatu. 18 Kubuno ndi bupieni bwavule ku mulembe, tabunavule lingo ku idagano, tondo ku idagano Kalaga abukasile ku Abrahamu mu mponga.

19 Umpanga mulembe guli kikizi? Watalikidwe ku kabamba ka makitilo mwa bwagi aaba nu kuvwa kwa kibuti kyalagilwe idagano; kyakakizizibwe na banzelo mu kuboko kwa mukulumania. 20 Tondo mukulumania nteli mukulumania wa umozi, tondo Kalaga eli umozi.

Mulimo wa Mulembe

21 Umpanga ndi mulembe wengukana na malagano ma Kalaga? Kilo aba nunse! Kubuno songo mulembe wakasenwe buno uvwame kukasana kalamo, bulili bunatukile lebelebe ku mulembe. 22 Tondo Masanzo makandile binsania mu bwagi, buno bubo bwalagilwe bukasanwe mu Yesu Kristo ku babo bakatizia.

23 Lwabusio lwa kuvwa kwa bukatizio, twabezaga twakandwa kunsi kwa bulangi bwa mulembe, ku kabamba ka bukatizio bwatunganenne kubisulwa. 24 Ububo mulembe wabede mulangi wa kutusondelezia ku Kristo, buno tube beisanana ku bukatizio. 25 Tondo gabede bukatizio bwavwa, tatuli lingo kunsi kwa mulangi.

26 Kubuno inyuwe bansania muli bana ba Kalaga ku bukatizio mu Yesu Kristo. 27 Inyuwe bansania mwatutikilwe mu Kristo, mwavwalile Kristo. 28 Takuli lingo muYuda aba muGriki, takuli lingo mukobe aba mukandulwa, takuli lingo wamulume aba mukikulu; kubuno beinyuwe bansania muli umozi mu Yesu Kristo. 29 Nu ndi muli baKristo, umpanga nti muli ba kibuti kya Abrahamu, bapieni kuyangana n'idagano.