Paulo nu Bango Basingwa
2
1 Kusila kwa myaka ikumi nu inazi, nabakamine lingo ku Yerusalema gamozi na Barnaba, nu Tito. 2 Nu nabakamineko kusila kwa kulolesibwa. Nabasambalide Musagu Musoga u nabezaga nkwigisia munkatini mwa baBilongo; nagusambede umpanga ku babo beli na bukuti, buno ninavwa kwituma lubilo aba kwenda lubilo buliabulia. 3 Tondo Tito wabezaga gamozi na nne, nu wabezaga muGriki, ntasindikilwe buno amonesibwe. 4 Nu bubo, ku kabamba ka tumanwa beiyingizizie nu kwibika munkatini mweitu mu lumbisombiso, buno batitike bukandulwa butuli nabo mu Yesu Kristo, gamozi na makengelo makutubika bakobe. 5 Tatwabakasile aba nkungu emozi, nu twananine makakizio mabo buno bulili bwa Musagu Musoga bwikale munkatini mweinyu. 6 Ku babo bakumonekaga buno beli banene aba buni bubabezaga wakalazi, ta kitondo kundi, (Kalaga ntakukutya muntu wampa) babo beli banene tabantalikide kena. 7 Tondo gabamonine buno nakasilwe Musagu Musoga ku batamonesibwa, anga bubo bwakasilwe Petro ku bamonesibwa, 8 kubuno wozo wakitile Petro musingwa wa bamonesibwa, ankitile nu nne musingwa wa baBilongo; 9 nu gabamenyine mponga zinakasilwe, Yakobo, Kefa, nu Yoana bakengedwe anga mango, bankasile, nne nu Barnaba, kuboko kwa seidume wa mugomio buno twende ku baBilongo, nu bo bende ku bamonesibwa. 10 Batusegile tugu buno tukengele bazambi, nu natundile nunse kukita kitondo kikino.
Paulo Akwakania Petro ku Antiokia
11 Tondo gavule Kefa ku Antiokia, namwakanizie meiso ku meiso, kubuno abezaga na katati, 12 kubuno lwabusio lwa kuvwa kwa bantu bamozi batukaga kwa Yakobo, aliaga gamozi na baBilongo, tondo nkungu zibabasile, eitonezie nu eidekanukizie na baBilongo ku boba bwa batamonesibwa. 13 Gamozi nage bango baYuda bakitile nu bo na bwengelezi bwabo. 14 Ganamonine buno tabakutabanga anga buli bwisanana bwa bulili bwa Musagu Musoga, nabwide Kefa lwabusio lwa bantu bansania bunee: “Ndi uwe uli muYuda, nu ukuyanga lukita lwa baBilongo, nu ntukuyanga lulo lukita lwa baYuda, kubuni ukukakizia nunse baBilongo kuyanga nkita za baYuda?”
Konibwa ku Bukatizio
15 Iswe tuli baYuda, ku kubutwa, nu ta bagi anga, baBilongo 16 twizi buno, muntu ntaneisanana ku makitilo ma mulembe, tondo ku bukatizio mu Yesu Kristo, aba iswe twakatizizie mu Yesu Kristo buno tube beisanana ku bukatizio mu Kristo, nu ta ku makitilo ma mulembe, kubuno takuli muntu wampa ukeisanana ku makitilo ma mulembe. 17 Tondo ndi tukulonda kuba beisanana mu Kristo, nu ndi twamonekile bagi iswe tubenyene, ndi Kristo anabede mukiti wa bwagi? Kilo aba nunse! 18 Kubuno, ndi nkukita lingo bitondo binasigile, nti nili mukaguzi wa mulembe. 19 Kubuno nakule ku mulembe, buno nilame mu Kalaga. 20 Natakilwe gamozi na Kristo, nu ndi nkulama, ta nne u ukulama, tondo Kristo u ukulama mundi; ndi nkulama kano kaluma mu mubili, nti nkulama mu bukatizio bwa Mwana wa Kalaga, wantundile nu wikasenne wenyene ku kabamba kane. 21 Nsikusiga mponga za Kalaga; kubuno ndi kwisanana kukumoneka ku mulembe, kasi nti Kristo akule buliabulia.