BAFILIPO
Kusambizania
1
1 Paulo nu Timoteo, bakiti ba Yesu Kristo, kuli baswagibwa bansania mu Yesu Kristo beli ku Filipi gamozi na balangi nu bakulu. 2 Mponga nu bubobelelo bikutukaga ku Kalaga Tateiswe nu ku Mukota weitu Yesu Kristo bibe kumuli. Paulo Ekusegela BaKristo ba ku Filipi
3 Nkusima Kalaga wane ku nkungu insania zinkumukengela. 4 Nu bindi binsania mu masego mane mansania nkumusegela na mbogimbogi. 5 Ku kabamba ka kugomia kweinyu mu kusambala Musagu Musoga, kutukila busi butangi aaba nu kano kaluma. 6 Nkukatizia buno wozo walingile mulimo wono musoga mumuli akagusililizia aaba nu ku busi bwa Yesu Kristo. 7 Buli bwisanana ndi nakengela bitondo bibino kumuli beinyuwe bansania, kubuno nkumukengela mu mutima wane, mu bikando byane, aba nu mu kulindia Musagu Musoga, inyuwe bansania bagomia na nne mu mponga zeno. 8 Kubuno Kalaga eli Mulongeki wane, buno namwelama bansania mu lutundo lunene lwa Yesu Kristo.
9 Nu kinkumusegela kukyo kili buno: lutundo lweinyu lwitile nunse mu menge nu mu bumenyinino bunsania, 10 buno mumenyinine bitondo bili bisoga nu mube bengibwa nu beteli n'itondoki; aaba nu kubasa ku busi bwa Kristo. 11 Mwizazibwe na biguma bya kwisanana bili mu Yesu Kristo, ku lutanuno nu ku luganuno lwa Kalaga.
Nsungio za Paulo Zalutile Bango mu Kristo
12 Kano kaluma, mibuto zane, nkutunda mwamenya buno bitondo binsania byambaside byabezaga buno Musagu Musoga witile nunse. 13 Kubuno bakoloboyo balangi bansania ba numba za mwangati nu ku bango bantu bansania, takuli wampa ukwiba buno ku kabamba ka Kristo ukinsa nili mu bikando. 14 Nu ku kabamba ka bikando byane, mibuto zane ningi mu Mukota bese na magala kusambala idagi lya Kalaga geteli boba.
15 Buligo, buno bamozi bakusambala musagu wa Kristo ku lugi nu ku mutima wa myango, tondo bango bakugusambala ku lutundo lusoga. 16 Babano bazinda bakukita bubo ku lutundo kubuno beizi buno nabikilwe gano ku kulanga Musagu Musoga, 17 tondo babo batangi bakusambala Musagu wa Kristo na makengelo ma nduma nu bakukengela buno bakutalika lusungio ku bikando byane.
18 Tabuli kena, tondo ku nkita insania, ndi ku bwengelezi aba ku bulili, Musagu wa Kristo ukusambalwa, nu ku kitondo kikino nkubogaboga nu nabogeboge. 19 Kubuno nizi buno bitondo bibino byabe lonio lwane ku kabamba ka masego meinyu nu ku kukasia kwa Muuza wa Yesu Kristo. 20 Anga bubo buli nunse kulindila kwane nu kilemanizio kyane, buno nsyabe na nsoni ku kitondo kyampa, tondo kano
kaluma anga bindi binsania, magala mane nunse meli buno Kristo aganunwe mu mubili wane, ndi ku kalamo kane aba ndi ku lukuo lwane, 21 kubuno kundi kulama kuli Kristo, nu kukua kuli mutali. 22 Tondo ndi nkulama mu mubili nti guli mutali wa mulimo wane, tondo nsizi kininasombola, 23 kubuno nkuzangazanga gasamba bitondo bibili; nkutunda nende buno nikale gamozi na Kristo, bubuno buli busoga nunse kutinga. 24 Tondo ku kabamba keinyu, buli busoga nunse nilame mu mubili. 25 Nu mukukatizia bubuno, nizi buno nikale gamozi n'inyuwe, nu nasigale gamozi n'inyuwe bansania; buno mukule nu mube na mbogimbogi mu bukatizio 26 buno ku kusubya kwane kumuli mwitile nunse kwikaka mu Yesu Kristo ku kabamba kane.
27 Umpanga endazi anga bwatananina musagu musoga wa Kristo buno ndi navwa kumumonako aba ndi nsiliko niungwe ku misagu zeinyu buno mwemana mu mutima umozi mu Muuza nu mukulwana bita na mutima umozi ku bukatizio bwa Musagu Musoga. 28 Nu tamukue beiti beinyu boba mu bitondo binsania kubuno bubuno bwabe kalolesio ka kuzimina kwabo, tondo kumuli keli kalolesio ka lonio lweinyu lukutukaga ku Kalaga. 29 Kubuno mwakasilwe mponga ku kabamba ka Kristo; ta kumukatizia tugu, tondo nu kubabazibwa ku kabamba kage, 30 ububo nu inyuwe mukulwana bibyo bita bimwamonaga nkulwana nu bimukungwa buno nikili nalwana.