BAKOLOSAYI
1
1 Paulo, musingwa wa Yesu Kristo ku lutundo lwa Kalaga nu Timoteo mubuto weitu. 2 Ku baswagibwa nu ku mibuto zeitu bakatizia beli ku Kolosayi. Mponga zibe kumuli nu bubobelelo kutuka ku Kalaga Tateiswe. Mbogimbogi za Paulo mu Masego
3 Tukusimaga Kalaga, Isi wa Mukota weitu Yesu Kristo nu tukumusegelaga bindi binsania; 4 kubuno tungule ku Musagu wa bukatizio bweinyu mu Yesu Kristo nu lutundo lumuli nalo ku baswagibwa bansania. 5 Ku kabamba ka kilemanizio kimwabikidwe mu meigulu, mungule ku Musagu Musoga wakyo wakalazi mu idagi lya bulili lya Musagu Musoga. 6 Wozo Musagu Musoga wabasile kumuli anga buguli mu kisi kinsania, nu kuko ukukolama biguma nu kukula anga buguli kumuli kutukila busi bumungule nu bumwamenyine nunse mponga za Kalaga mu bulili. 7 Anga bumwigisizibwe na Epafra, mukiti muneitu mutundwa eli kumuli mukiti mukatizia wa Kristo ku kabamba keinyu. 8 Nu atusambalide lutundo lumuli nalo.
9 Ku kabamba kakano nu iswe, kutukila busi butungule ku bubo, tatukulekela kumusegela ku Kalaga, tukusega buno mwizazibwe na bumenyinino bwa lutundo lwage, mu menge mansania nu bumenyinino bwa Muuza, 10 buno mutabange anga bwatunganana ku Mukota nu kumutananizia nunse, mukolame biguma mu mulimo na mulimo musoga, nu kukula mu bumenyinino bwa Kalaga. 11 Mulindibwe ku magala mansania, na bupuka bwa lutanuno lwage buno mube na nkiki insania nu kwikalila mu mbogimbogi, 12 nu kusima Tateiswe wamuswagizie buno mube na bupieni gamozi na baswagibwa mu kyengi. 13 Atutikizye mu magala ma kapilo nu atukumwine mu Bukota bwa Mwana wage mutundwa. 14 Mweli tuli na bukuluzi nu isigililo lya bwagi.
Bumuntu bwa Kristo nu Mulimo Wage
15 Kristo eli kisusania kya Kalaga utakumonekako, nkula za bibumbwa binsania. 16 Kubuno mweli bintu binsania byabumbilwe, bili mu meigulu nu bili ga kisi; bikumonekako nu bitekumonekako, ndi bili bisumbi bya bakota aba bukota aba bwangato aba magala; binsania byabumbilwe nage nu ku kabamba kage. 17 Eli lwabusio lwa binsania nu binsania bikukulumanibwa mweli. 18 Eli itoe lya mubili u Kanisa; eli mutangi, nu nkula za kutuka ku bakuzi, buno abe mutangi mu binsania. 19 Kubuno Kalaga atundile buno kuzindilila kunsania kwikale mweli; 20 nu atundile buno mweli binsania bikulumanizibwe gamozi nage wenyene, bibyo bili ga kisi nu bibyo bili mu meigulu, kweli alusizie bubobelelo mu mikila zage ku musalaba.
21 Nu inyuwe mwabezaga wakalazi bulazi na Kalaga, nu beiti mu makengelo meinyu nu ku makitilo meinyu mabi. 22 Tondo kano kaluma ku lukuo lwage, amukulumanizie mu mubili wage buno amulolesie lwabusio lwage mube baswagibwa, geteli itondoki nu geteli lukumu lubi. 23 Umpanga ndi mwikala busoga mu bukatizio nu tamukutengatenga, aba tamukugalukya kusiga kilemanizio kya Musagu Musoga u mungule kugo, wasambedwe ku bibumbwa binsania bili mu kisi, nu ku bubuno nne Paulo nabede mukiti wago.
Paulo Akasilwe Mulimo wa Kusambala Musagu Musoga ku Babilongo
24 Kano kaluma nkubogaboga mu mbabazio zane ku kabamba keinyu; nu kikyo kyida ku mbabazio za Kristo, nakizindilizia mu mubili wane ku kabamba ka mubili wage uli kanisa. 25 Ku kabamba kako u kunabede mukiti wa kanisa anga mulimo u nakasilwe na Kalaga kumuli buno nisambale bwasibwasi idagi lya Kalaga. 26 Keinda kabezaga kabiswa kutukila wakalazi ku nkiko insania nu ku bibuti binsania, tondo kano kaluma kese kabisulwa ku baswagibwa bage. 27 Kubuno Kalaga atundaga kubamenyesia buni buli bugumi bwa lutanuno lwa keinda kakano munkatini mwa Babilongo, kumenya Kristo mumuli, u kilemanizio kya lutanuno. 28 Tukusambala musagu wage, tukwana muntu na muntu, mu menge mansania, buno tulusie muntu na muntu ku Kalaga buno asililile mu Kristo; 29 ku bubuno nkwikasana nunse na magala makukita mundi bubibu.