4
1 Ububo mibuto zane, batundwa bane bankukwila malima, mbogimbogi zane nu nkumbu zane za lutanuno, lindazi nunse mu Mukota. 2 Nkusega nunse Ewodia nu Sintike, buno babe na makengelo mamozi mu Mukota. 3 Nu uwe lingo mukiti munane wa bulili, nkukusega buno ukasie bakikulu babano, kubuno beikasenne nunse gamozi na nne ku mulimo wa Musagu Musoga, gamozi na Klementi nu na babo bango banakitaga nabo mulimo. U babo, meina mabo meli mu mukanda wa Kalamo.
4 Bogazibogazi mu Mukota bindi binsania, nu nkutenda lingo buno bogazibogazi!
5 Kubota kweinyu kumenywe na bantu bansania. Mukota eli bwigi. 6 Tamwikutie ku kampa, tondo mu kitondo na kitondo, ku kusega nu ku kubuzia gamozi na kusima, mulolesie masego meinyu ku Kalaga. 7 Nu bubobelelo bwa Kalaga bubo bwatinga menge mansania bwalange mitima zeinyu nu makengelo meinyu mu Yesu Kristo.
8 Umpanga, mibuto zane, bitondo binsania bili bya bulili, binsania bili bya lwanzo, binsania bili bisanana, binsania bili bisoga, binsania bikutananizia, binsania bikulumbibwa busoga, ndi bili bisoga aba ndi bili luganuno, nti mukengele ku bitondo bibino. 9 Bitondo bimwigile, bimwakatile nu bimungule kundi nu bimwamonaga nkukita, bikitazi. Nu Kalaga wa bubobelelo abe gamozi n'inyuwe.
10 Nabede na mbogimbogi nnene mu Mukota bumwankengedeko lingo. Mwabezagile lebelebe na makengelo mamano bindi binsania, tondo mwidile nkungu za kubukita. 11 Nsikutenda bubuno ku kabamba ka meiyanino mane kubuno nigile kuba na mbogimbogi ku bitondo binsania byambasilego. 12 Nizi buni bwa kulama mu muzambo, nu nizi buni bwa kulama mu bugumi, mu bitondo binsania nu kunsania nigile kuba na bubobelelo aba ndi nembuka, aba ndi nili na nzala, aba ndi nili na byingi, aba ndi nili na bikeke. 13 Ninavwama kukita bitondo binsania mu wozo ukunkasaga magala. 14 Tondo mwakitile busoga nunse, kugomia na nne mu mbabazio zane.
15 Nu inyuwe baFilipi mwizi buno, mu kulinga kwa busambazi bwa Musagu Musoga, ganatukile ku Makedonia, takwabede kango kanisa kagomezie na nne ku kitondo kya kukasana nu kya kukata, umpanga beinyuwe mubenyene. 16 Kubuno aba mu nkungu zinabezagile ku Tesalonika, mwansingide bukasia mambizi mabili ku biniyaninaga. 17 Ta kubuno nkulonda nkaso, tondo nkulonda mutali weinyu witile. 18 Kano kaluma nili na binsania byatunganana, aba nu kutinga, nizile na bintu binakatile kwa Epafrodito kutukila kweinyu, bulago bwa nsunu nsoga, kisansa kitabizibwa na Kalaga nu kikumutananizia. 19 Nu Kalaga wane amukase binsania bimukwiyanina, bulingilingi na bugumi bwage mu lutanuno lwage mu Kristo Yesu. 20 Ku Kalaga Tateiswe kube lutanuno ku nkiko na nkiko. Amena.
Kusambizania Kuzinda
21 Nsambiziazi beisanana bansania mu Yesu Kristo. Mibuto zeitu zili gamozi na nne zamusambizia. 22 Baswagibwa bansania bamusambizia, kwitila nunse babo ba mu numba za Kaisari.
23 Mponga za Mukota Yesu Kristo zibe gamozi na myuza zeinyu, beinyuwe bansania.