Lukita Lusoga lwa Kuba Wisanana Lwabusio lwa Kalaga
3
1 Umpanga, mibuto zane, bogazibogazi mu Mukota. Nsikukutwa na kumusanzila bitondo bibyo lingo, nu kumuli, bili mutali. 2 Idangazi na mboa, idangazi na babo bakiti babi, idangazi na meigisia ma kumonesibwa. 3 Kubuno beiswe u bamonesibwa ba lebelebe, beiswe bakukumbamina Kalaga mu Muuza wa Kalaga, nu bakwiganuna mu Yesu Kristo geteli bitondo bya mubili, 4 tondo nne ninakatizia bitondo bya mubili. Ndi ungo muntu akukengela bitondo bya kukatizia bitondo bya mubili, nne nti u wamutinga nunse. 5 Namonesizibwe ku kindi kya kinana, nili muntu wa kilongo kya baIsraeli, wa kikanga kya Benjamina, muEbrania wabutilwe na baEbrania, ku bitondo bya mulembe nili muFarisayo, 6 ku komanizia nababazagia Kanisa, ku kitondo kya kwisanana mu mulembe, nsyabezaga na katati. 7 Tondo bitondo bibino binsania byabezaga mutali kundi, nabiganzile kuba buliabulia ku kabamba ka Kristo. 8 Nu lingo nkumona bitondo bibino binsania kuba anga buliabulia ku kabamba ka busoga nunse bwa kumenya Yesu Kristo Mukota wane, ku kabamba kage nasigile binsania, nu nabimonine kuba anga busasa buno nibe na Kristo. 9 Nu nimonekeko mweli, ta na kwisanana kwane nnenyene, kwisanana kuko kukutuka ku mulembe, tondo kuko kukumoneka ku bukatizio mu Kristo, kwisanana kuko kukutuka ku Kalaga ku bukatizio. 10 Buno nimenye Kristo, nu magala m'iyukilo lyage, nu mugomio wa mbabazio zage, nu nisusanibwe nage mu lukuo lwage. 11 Buno ndi bwakulungana nibase ku iyukilo kutuka ku bakuzi. 12 Ta kubuno nise nasila kukata bibino binsania aba nise nasililila, tondo nkuyangilila lugendo nikokomezie bitondo bibyo binakokomezizibwe na Yesu Kristo. 13 Mibuto zane, nsikukengela buno nise nasila kubikokomezia; tondo nkukita kitondo kimozi: nkwibilila bibyo bya kulinga, nu nise nayanga bibyo bya lwabusio. 14 Nkuyangilila lugendo buno nikate ku lukaso lwa mubila wa kwigulu wa Kalaga mu Yesu Kristo.
15 Umpanga beiswe bansania beseli bantu bakulu banene tube na makengelo mamano, nu ndi ku bimozi muli na makengelo mengukana, nti Kalaga amulolesie mo. 16 Tondo gago gatwikide, tuyangazi mamo makengelo mamozi mukyo.
BaKristo Bayange Lukita Lusoga
17 Mibuto zane, nyangazi; nu mulole nunse bukutabanga babo bakuyanga lukita lutwamulolesizie. 18 Kubuno nise namusambalila mambizi meingi nu kano kaluma nkubutenda lingo na bisozi buno kuli bantu beingi bakutabanga anga beiti ba musalaba wa Kristo. 19 Kuzinda kwabo kuli buzimizi, kalaga kabo keli nda zabo. Lutanuno lwabo luli mu nsoni zabo, makengelo mabo meli mu bitondo bya kisi. 20 Kubuno iswe tuli ba kwigulu; nu tukulindila Monia kutuka ko, u Mukota Yesu Kristo, 21 ukagalukya mibili zeitu za nsoni, buno zisusanie na mubili wage wa lutanuno, ku magala mage akakinda binsania kuba kunsi kwage.