Kwibotya nu Bunene bwa Kristo
2
1 Umpanga ndi kuli kukasana magala mu Kristo; ndi kuli kubobelezania mu lutundo lwage, ndi kuli mugomio mu Muuza, ndi kuli mponga nu kyombo, 2 mbogiazimbogiazi nunse, buno mube na makengelo mamozi, na lutundo lumozi na mutima umozi mu muuza; nu mugomio umozi. 3 Tamukite kitondo kinsania na mutima wa myango aba ku lwikotio lwa buliabulia, tondo ku kwibotya, muntu na muntu akutye munyage munene kutinga bwikutya wenyene. 4 Muntu na muntu mumuli ntakengele bitondo byage wenyene, tondo nawe nawe akengele bitondo bya bango. 5 Mube na makengelo mamano mumuli anga bumabezaga mu Yesu Kristo. 6 Kubuno We wabezaga mu lukita lwa Kalaga,
Ntamonine buno kugelama kwage na Kalaga kuli kena.
7 Tondo eikungula lutanuno wenyene nu kwibika anga mukobe,
nu kuba kisusania kya muntu.
8 Nu kuba anga muntu wenyene, abede mwiya lwanzo aaba nu ku lukuo,
u lukuo lwa musalaba.
9 Ku bubuno Kalaga amusakikile nunse nu amukasile izina
lili gantata ga meina mansania;
10 Buno ku izina lya Yesu, izu n'izu likomwe,
lya bili mu kisi nu kunsi kwa kisi.
11 Nu buno na lulami na lulami lweitabizie buno Yesu Kristo eli Mukota
ku lutanuno lwa Kalaga Tateiswe.
BaKristo Besane Anga Kyengi mu Kisi
12 Umpanga batundwa bane, anga bubo bumwanzaga bindi binsania ganabezaga kuko, aba ndi nkungu zinsili kuko, mwitile kukita mulimo ku lonio lweinyu gamozi na boba, nu kugilimina ta umpanga ganikileko, tondo kwitila nunse gansili kuko. 13 Kubuno Kalaga u gukukita mulimo mumuli kutunda nu kukita anga bukumutananizia.
14 Kitazi bitondo binsania geteli manungunungu nu myango. 15 Buno mube bana ba Kalaga beteli na lukumu lubi, nu beteli n'itondoki aba kisimboa munkatini mwa kibuti kibi nu kyalubikana; munkatini mwakyo inyuwe mukumoneka anga kyengi mu kisi. 16 Ndi mwakokomezia idagi lya kalamo, nti nkeikaka mu busi bwa Kristo buno nsitumine lubilo buliabulia aba nsyakitile mulimo wa buliabulia.
17 Tondo aba ndi mikila zane zakubuka buno nibe kisansa ku kabamba ka bukatizio bweinyu; nti nkubogaboga nunse na bubo, nu nkubogaboga gamozi na beinyuwe bansania. 18 Bubo nu inyuwe bogazibogazi nu mubogeboge gamozi na nne.
Timoteo nu Epafrodito
19 Nkulemanina mu Mukota Yesu kumusingila Timoteo ku bindi byavwe buno nibogeboge kungwa ku misagu zeinyu. 20 Kubuno nsili na ungo muntu wampa u nili nage bumenyinino bumozi, unalangana lebelebe na bitondo byeinyu. 21 Kubuno babo bansania bakulonda mutali wabo bobenyene, tondo ta wa Yesu Kristo. 22 Tondo mwizi bulili bwage ku kwikasana ku mulimo wa Musagu Musoga gamozi na nne anga mwana gamozi n'isi. 23 Ububo nkulemanina kumusinga kumuli, nkungu zinamenyinine bwabe bitondo byane. 24 Nu nkukatizia mu Mukota buno mu bindi bikuvwa, navwe nnenyene.
25 Tondo namonine buno buli busoga kumusingila Epafrodito, mubuto wane nu mukiti wa mulimo gamozi na nne, mulwani wa bita gamozi na nne, nu we ugumwansingile na bukasia ku meiyanino mane. 26 Kubuno abezagile na lutundo nunse kumumonako inyuwe bansania, nu abezagile na kabebe kanene, kubuno mungule buno abezagile na lusambo. 27 Kubuno lebelebe abezaga musambi bwigi na kukua, tondo Kalaga amukwilide kyombo, nu ta we umpanga, tondo nu nne buno nsibe na kabebe gantata ga kabebe. 28 Ku bubuno nakitile magala nunse kumusinga buno gamwamumoneko lingo, nti mwabogeboge nunse, nu kabebe kane nti kakokoka. 29 Umpanga mumusekele mu Mukota na mbogimbogi nnene nu mwanze bantu beli anga wono. 30 Ku bubuno, ku kabamba ka mulimo wa Kristo u kwabezagile eseli bwigi na kukua, ntangile kalamo kage, buno asililizie bimwidile mu mulimo gamutabezagako.