Paulo Ekubatonda
2
1 Nkutunda buno mumenye geigezye bita bibibu binili nabyo ku kabamba keinyu, nu ku kabamba ka babo beli ku Laodikia; nu babo bansania batamonine ku kilungi kyane, 2 buno mitima zabo zibe na magala nu bakulumanibwe mu lutundo nu begumibwe na menge mansania, buno basongolole keinda ka Kalaga, u Kristo, 3 Mweli u mwabisilwe bikagi binsania bya menge nu bya bumenyinino. 4 Nkutenda bubuno buno muntu wampa ntamwengelele na bitondo byage bisoga bya kumulindika. 5 Aba ndi nsili gamozi na inyuwe ku mubili, tondo nti nili gamozi na inyuwe mu Muuza; nu nkubogaboga kumona ku bulongeki busoga munkatini mweinyu nu kukulinda kwa bukatizio bweinyu mu Kristo.
6 Umpanga anga bubo bumwakatizizie Yesu Kristo Mukota, bubo u bumutabanga mweli, 7 buno mube na mizi mweli nu kobakwa mweli nu mulinde mu bukatizio anga bumwigisizibwe, nu kwitila nunse mu mbogimbogi. 8 Mwidangazi buno muntu ntamubigie na menge mage ma kisi nu bwengelezi bwa buliabulia ku nkita za bumba bwa bantu nu ku lukita lwa kalingilo ka bitondo bya mu kisi, tondo ta ku lukita lwa Kristo.
Kristo Akutukasia mu Bitondo Binsania
9 Kubuno mweli u mukwikala kuzindilila kunsania kwa buKalaga mu mubili wage. 10 Nu muli na kuzindilila kunsania mu Kristo, We eli itoe lya bwangato bunsania nu bukota bunsania.
11 Mweli u mumwamonesizibwe, kumonesibwa kutakitilwe na maboko ma bantu, tondo kututikya ku mubili wa misuna, ku kumonesibwa kukukitwa mu Kristo! 12 Mwayikilwe gamozi nage mu lubatizio nu mwayukile lingo gamozi nage mu bukatizio bweinyu mu magala ma Kalaga wayukizie Kristo kutuka ku bakuzi. 13 Inyuwe babezaga bakuzi ku kabamba ka bwagi bweinyu nu ku kabamba ka kutamonesibwa ku mubili weinyu, amukasile kalamo gamozi na Kristo, nu atusigilide ku bwagi bweitu bunsania. 14 Azimizie masanzo makukakizia mabezaga makutusungia nu mabezaga mabikwa kutuli; amatikizye nu kumabika ku musalaba wage. 15 Nu atikizye bukota nu bwangato nu abilolesizie bwasibwasi nu abikindile ku musalaba.
Kisusania kya Bitondo Bikavwa
16 Umpanga, muntu ntamusungie ku kabamba ka bimukulia aba ku kabamba ka bimukunua aba ku kabamba ka busi bunene, nu ku kabamba ka kubala kwa mwezi aba ku busi bwa Sabato. 17 Bibino binsania bili kilimelime kya bitondo bikavwa, tondo mubili guli wa Kristo. 18 Muntu wampa ntamunyage lukalilo lweinyu mu kwibotya kwage kwa bwengelezi nu ku kukumbamina banzelo, akwibika mu bitondo byage byamonine kubyo nu akwikotia mu bitondo byage bya buliabulia nu makengelo mage ma mubili. 19 Geteli kwidanda ku Kristo uli Itoe, kweli mubili wage unsania ukukasibwa nu kukulumanibwa gamozi ku ngiginyo nu miki nu ukukula ku lutundo lwa Kalaga.
Kukua nu Kulama Gamozi na Kristo
20 Ndi mwakule gamozi na Kristo ku bitondo bya kisi, kubuni kumukwibika ku makakizio makyo anga mukili ba mu kisi? 21 Tamukate! Tamusonde! Tamwitubye! 22 Bitondo bibino binsania bikubiga ku kukita nabyo, kubuno bikuyanga makakizio nu meigisia ma bantu. 23 Makakizio mamano makumoneka meli na menge ku nkita za kukumbamina ku lutundo lwabo bobenyene nu ku kwibotya bobenyene kwa bwengelezi nu ku kubabazia mubili bubibu, tondo bubo tabuli na kampa ku kwizugila ku lutundo lwa mubili.