1 BATESALONIKA
Kusambizania
1
1 Paulo, nu Silvano nu Timoteo, ku kanisa keli ku Tesalonika, keli mu Kalaga Isi nu mu Yesu Kristo Mukota: mponga nu bubobelelo bibe kumuli! Kalamo nu Bukatizio bwa Bantu ba ku Tesalonika
2 Tukusima Kalaga bindi binsania ku kabamba keinyu bansania, nu tukumukengela nunse mu masego meitu. 3 Tukukengela kankanka mulimo weinyu wa bukatizio, mulimo wa lutundo lweinyu, nu komanizia ka kilemanizio kyeinyu mu Mukota weitu Yesu Kristo, lwabusio lwa Kalaga Tateiswe. 4 Mibuto zeitu batundwa ba Kalaga, twizi buno mwasombwedwe; 5 Musagu Musoga weitu tawasambalidwe kumuli ku kutenda tugu, tondo gamozi na magala ma Muuza Wasililila, nu gamozi na bumenyinino nunse, kubuno mwizi nkita zitwabezaga nazo munkatini mweinyu. 6 Nu inyuwe mubenyene mwabede muse mwatususania nu kususania Mukota, gamwamenyine idagi munkatini mwa nsungio ningi, gamozi na mbogimbogi za Muuza Wasililila, 7 nu bubo mwabede kalolesio ku bakatizia bansania ba ku Makedonia nu ba ku Akaya. 8 Kubuno idagi lya Mukota lyungwilweko kutuka kweinyu, ta ku Makedonia nu ku Akaya tugu, tondo ku kiziki na kiziki, bukatizio bweinyu lingo ku Kalaga bwasambedwe, aba tatukwiyanina kutenda bungo. 9 Kubuno bakusambala misagu zeitu ku lukita lutwabasile nalo munkatini mweinyu nu lukita lumwagalukide ku Kalaga mu kusiga nkisi, buno mukitile Kalaga uli mulami nu wa bulili, 10 nu ku kulindila Mwana wage kutuka mwigulu, wozo waayukizie kutuka ku bakuzi, u Mwana wage Yesu, watwonezie ku bongoa bukavwa.