Mulimo Wazindilizizibwe na Paulo ku Tesalonika
2
1 Mibuto, mwizi mubenyene buno kubasa kweitu kweinyu takwabezaga buliabulia. 2 Gatwasilile kubabazibwa nu kulingwa ku Filipi, anga bumwizi, twabezaga na magala mu Kalaga weitu, ku kumusambalila Musagu Musoga wa Kalaga mu mbabazio ningi. 3 Kubuno kwigisia kweitu takuli ku buza, aba ku bitondo bya nsese, aba ku bwengelezi; 4 tondo, kubuno Kalaga amonine buno twakuka kukaswa Musagu Musoga, tukutenda, ta anga bakutananizia bantu tondo Kalaga u gukulindikaga mitima zeitu. 5 Kubuno tatwakitile bitondo bya kwitananizia nkungu insania anga bumwizi; aba tatwabezaga na ntundo za bikulo, Kalaga eli mulongeki wabyo. 6 Tatwalondile lutanuno ku bantu, aba kumuli, aba ku bango; tunabede na bwangato anga basingwa ba Kristo, 7 tondo twabezaga twola munkatini mweinyu, anga bukulelaga mulezi alela bana bage. 8 Ku lutundo lweitu nunse kumuli, twamutundile, ta kumukasa Musagu Musoga wa Kalaga tugu, tondo twikasenne tubenyene, kubuno muli batundwa beitu. 9 Mibuto, mukukengela mulimo weitu nu nsungio zeitu; musi nu kindi tukukita mulimo buno tatubike buzitu ku muntu wampa wa kumuli, twamusambalide Musagu Musoga wa Kalaga. 10 Muli balongeki, nu Kalaga eli nu We mulongeki wa lukita lweitu lwasililila, lwisanana, nu luteli na luteli na katati kamozi, lutwabezaga nalo lwabusio lweinyu inyuwe bakukatizia. 11 Mwizi lingo butwanine muntu na muntu wa kumuli anga bukwanaga isi bana bage, 12 buno tumukase magala, tumubobelezie, nu tukumusega nunse buno mutabange mu lukita lwatananina ku Kalaga, ukumumana kuba na bukota bwage nu ku lutanuno lwage.
13 Kubuno tukusimaga Kalaga bindi binsania buno gamwasambalidwe idagi lya Kalaga, litwamusambalide, mwalisekede, ta anga idagi lya bantu, tondo anga bulili lebelebe, idagi lya Kalaga, likukita mulimo mumuli inyuwe bakukatizia. 14 Kubuno inyuwe mibuto, museli kisusania kya makanisa ma Kalaga meli mu Yudea, mu Yesu Kristo, kubuno nu inyuwe lingo mwababazizibwe na bantu ba kilongo kyeinyu mubenyene mu bibyo bitondo bimozi bibabazizibwe kubyo na baYuda. 15 Babo u beitile Mukota Yesu nu balengania, nu batubabazizie nunse, nu batakutananizia Kalaga, nu beli beiti ba bantu bansania. 16 Bakutuzugila buno tatutende na baBilongo buno banavwa konibwa, nu buno bazindilizie bwagi bwabo nkungu insania. Tondo bongoa bwa Kalaga buse bwasila kubabasila.
Paulo Akutunda Kumonana na baTesalonika Lingo Limbizi
17 Tondo, mibuto zeitu, kusila kwa kulekanuka n'inyuwe ku mubili, ku nkungu nkeke, tondo ta ku mutima, iswe twabede na lutundo lunene nunse kumumonako. 18 Ku bubuno, twatundaga kuvwa kumuli, nne Paulo, ku limbizi itangi, aba nu ku limbizi lya mabili, tondo Satana atubigene. 19 Kubuno kikizi u kilemanizio kyeitu, aba mbogimbogi zeitu, aba lukalilo lweitu, u nkumbu za lutanuno? Ndi ta inyuwe lingo lwabusio lwa Mukota weitu Yesu, ku nkungu za kuvwa kwage? 20 Ee, beinyuwe u muli lutanuno lweitu nu mbogimbogi zeitu.