2 BATESALONIKA
Kusambizania
1
1 Paulo, Silvano nu Timoteo, ku Kanisa ka Kalaga Tateiswe nu mu Mukota Yesu Kristo, keli ku Tesalonika, 2 mponga nu bubobelelo kutuka ku Kalaga Tateiswe nu ku Mukota Yesu Kristo bibe kumuli! Lusungio Lwabikilwe ku Busi bwa Kuvwa kwa Kristo
3 Ku kabamba keinyu mibuto, twatunganana kusima Kalaga bindi binsania anga bubo bwaswaga, kubuno bukatizio bweinyu bukwitila nunse kukula, nu lutundo lwa muntu na muntu wa ku muli mubansania ku bango bantu lukwitila nunse kukula. 4 Ububo lingo iswe tubenyene tukwikakila mumuli mu makanisa ma Kalaga, ku kabamba ka kwikalila kweinyu nu ka bukatizio bweinyu munkatini mwa nsungio zeinyu insania nu mbabazio zimukwikalila.
5 Kako keli kalolesio ka lusungio lwisanana lwa Kalaga, buno mube batananina kwingila mu Bukota bwa Kalaga, bumukubabazibwa ku kabamba kabo. 6 Kubuno buli bwisanana ku Kalaga, kubabazia babo bakumubabazagia, 7 nu kumukasa kyumuno, inyuwe bakubabazibwa gamozi n'iswe, ku nkungu za kumoneka kwa Mukota Yesu kutuka Mwigulu gamozi na banzelo ba magala mage, 8 nu kusungia mu ndembelela za keiya, babo bateizi Kalaga nu batakwanza Musagu Musoga wa Mukota weitu Yesu. 9 Babe na lusungio lwa lukuo luteli na kuzinda, kutukibwa lwabusio lwa Mukota nu lwa lutanuno lwa magala mage, 10 mu busi bubo bwavwe buno aganunwe mu basililila bage nu ku kutanunwa mu bansania bakatizizie; kubuno bulongeki bweitu kumuli bwakatizizibwe mu busi bubo.
11 Ku bubuno lingo, tukumusegela bindi binsania buno Kalaga weitu amuganze kuba batananina mu mubila wage, nu buno azindilizie ku magala mage ntundo insania nsoga za busoga bwage, nu mulimo wa bukatizio bweinyu; 12 ububo, izina lya Mukota weitu Yesu liganunwe mumuli, nu inyuwe muganunwe mweli, ku mponga za Kalaga weitu nu za Mukota Yesu Kristo.