Wozo Mubi
2
1 Mibuto, tukumusega nunse, ku kuvwa kwa Mukota weitu Yesu Kristo, nu ku musanganano weitu gamozi nage, 2 buno tamusasie kuzangibwazangibwa mu makengelo meinyu nu tamube na boba ku mutima, aba ku kitondo, aba ku mukanda buno ukutuka kutuli, anga buno busi bwa Mukota bwasila kubasa. 3 Muntu wampa ntamwengelele mu bitondo binsania, kubuno busi bubo tabunabasa ndi bulili tabusombwa nu kulolesibwa kwa wozo muntu wa bwagi, mwana wa buzimizi, 4 musombi ukwizanzula gantata ga kinsania kikumanwa Kalaga aba kikyo kikukumbaminwa, eikale aba mu numba za kukumbamina Kalaga nu kwidolesia wenyene buno eli Kalaga. 5 Ndi tamukukengela buno namubwide bitondo bibino, nkungu zinabezaga lingo kweinyu? 6 Nu kano kaluma mwizi wozo ukumusunga buno, ntalolesibwe aaba nu ku nkungu zage. 7 Kubuno keinda ka bwagi kakukita mulimo aaba nu kano kaluma: bwatunganana tugu buno, wozo uki wamusunga atikibwe. 8 Nu gago, wozo mubi akalolesibwa, u wozo ukakua na muuza wa kanua ka Mukota Yesu, nu ukasungibwa na mulabyo wa kuvwa kwage. 9 Kuvwa kwa wozo mubi kwakitwe ku magala ma Satana gamozi na migeleko za nkita insania, tulolesio nu miganogano za buza, 10 nu gamozi na bwengelezi bunsania buteisanana ku babo bazimina, kubuno tabeitabizizie lutundo lwa bulili buno bonibwe. 11 Ububo Kalaga akubasingila magala ma kubeitia kiti buno bakatizie buza, 12 buno babo bansania batakatizizie bulili basungibwe, tondo babezaga bakwibogiabogia mu bitondo biteisanana.
Mwasombwedwe Buno Mwonibwe
13 Mibuto, batundwa ba Mukota, twatunganana kusima Kalaga kankanka ku kabamba keinyu, kubuno mukulinga Kalaga amusombwede buno, mwonibwe ku kusililila mu Muuza Wasililila nu bukatizio mu bulili. 14 Ku bitondo bibyo u kwamumanine, ku Musagu Musoga weitu, buno mube na lutanuno lwa Mukota weitu Yesu Kristo. 15 Umpanga, mibuto, lindazi, nu mukokomezie meigisia matwamwigisizie, ku kutenda, aba ku mukanda weitu.