1 TIMOTEO
Kusambizania
1
1 Paulo, musingwa wa Yesu Kristo ku kukakizia kwa Kalaga Monia weitu nu Yesu Kristo kilemanizio kyeitu, 2 ku Timoteo mwana wane wa bulili mu bukatizio: Mponga nu kyombo nu bubobelelo bikutukaga ku Kalaga Tateiswe nu Yesu Kristo Mukota weitu bibe gamozi nobe. Kwidanga na Meigisia ma Buza
3 Anga bubo bunakusengezizie ganendaga ku Makedonia, nakulagile buno usigale ku Efeso buno uzugile bantu bakwigisia meigisia ma lungo lukita. 4 Batende buno, basombe misumo za buza ziteli na bwisulilwa, misagu za bibuti bya batatangulu iswe. Bibino bikulusia tugu myango; aba tabikulolesia mulimo wa Kalaga wa bukatizio. 5 Tondo kuzinda kw'ikakizio lilino kuli lutundo lukutuka ku mutima musoga nu ku kalenganio kasoga nu ku bukatizio bwa bulili. 6 Bamozi basigile bukatizio nu bagalukile ku kutendatenda kwa buliabulia. 7 Bakutunda kuba basozi ba mulembe wa Kalaga, tondo tabeizi bitondo bibakutenda aba bibakwigisia nunse.
8 Twizi buno mulembe guli musoga, ndi muntu akita anga buguli, 9 nu twizi buno mulembe tagukubikwa ku kabamba ka babo bakukita busoga, tondo ku kabamba ka bakukita bubi, nu bakusomba mulembe, beli babi, bakiti ba bwagi, batakwanza Kalaga, nu beli bagi, bakulibula beisibo, nu baninabo, nu beli beiti, 10 ku bitazi, bamulume bakulimbania bwabobwabo, nu bakukunzia bantu, bakwekaga buza, nu bakulumbila buza, nu babo bakukita bitondo byengukana na meigisia ma bulili. 11 Meigisia mamano meli Musagu Musoga wa lutanuno lwa Kalaga wa mbogimbogi, maankasile.
Kusima Mponga za Kalaga
12 Nkusima Yesu Kristo Mukota weitu wandindizie kubuno amonine buno nili mukatizia nu ambikile mu mulimo wage. 13 Nalingaga kuba mulingani, nu nababazagia bantu nu nabezaga nsuzi, tondo nakwilidwe kyombo, kubuno nakitile bubuno mu bukongolo nu mu kutakatizia. 14 Nu mponga za Mukota weitu zitide nunse gamozi na bukatizio nu lutundo luli mu Yesu Kristo. 15 Kitondo kikino kili kya bulili, nu kyatunganana kwitabizibwa nunse na bansania: buno Yesu Kristo avule mu kisi buno onie bagi, nu nne nili mutangi kubeli, 16 tondo ku bubuno, Kalaga ankwilide kyombo, buno mundi tanga, Yesu Kristo alolesie kwikalila kwage kunsania, buno nibe kalolesio ku babo bakamukatizia buno babe na kalamo katanakuzinda. 17 Kano kaluma ku Mukota wa nkiko na nkiko utakukuaga, utakumonekagako, Kalaga umozi tugu, kube lutanuno nu lwanzo ku nkiko na nkiko. Amena!
18 Timoteo, Mwana wane, nkukukakizia ikakizio lilino, ku kabamba ka bulengania bwalenganizibwe wakalazi kuguli, kokomezia bitondo bibino nu nti witane bita bisoga. 19 Umpanga kokomezia bukatizio na kalenganio kasoga. Bango basombile kungwa ku kalenganio kabo nu ku bubo, babigizie bukatizio bwabo. 20 Mu babano muli Himeneo nu Alesanduro, nabakasenne ku Satana buno beigisibwe buno tabalinge lingo Kalaga.