2 TIMOTEO
Kusambizania
1
1 Paulo, musingwa wa Yesu Kristo ku kusombola kwa Kalaga, anga buli idagano lya kalamo keli mu Kristo Yesu, 2 ku Timoteo mwana wane mutundwa: mponga, kyombo, nu bubobelelo bikutukaga ku Kalaga Tateiswe nu ku Mukota weitu Yesu Kristo bibe kuguli! Kuganuna nu Kubobelezibwa kwa Bakatizia
3 Nkusimaga Kalaga u nkukumbaminaga, anga bwakitile batatane ba wakalazi, mu kalenganio kaswagibwa, nu nkukusegelaga kankanka musi nu kindi. 4 Nkukengela bisozi byobe, nu nkutunda nunse kukumonako buno nitile kuba na mbogimbogi. 5 Nkukengela bukatizio bwobe bwa bulili buguli nabo, nu bukatizio bubo bwa nyokongulu Loisi nu nyoko Euniki bubabezaga nabo lwabusio lwobe. Nizi lebelebe buno uli nabo nu uwe. 6 Ku bubuno nkukukengelezia tanga lukaso lwa Kalaga luwamonine ku kubika maboko mane. 7 Kubuno Kalaga ntatugede mutima wa kukua boba, tondo mutima wa magala, lutundo, nu wa bumenyinino busoga.
8 Umpanga, ntukue nsoni ku bulongeki bwa Mukota weitu, aba ku kabamba kane, nne mukandwa wage. Tondo babazibwa gamozi na nne ku kabamba ka Musagu Musoga, ku magala makukasile Kalaga. 9 Wozo watonezie, nu watumanine na mubila wasililila, ta ku makitilo meitu, tondo ku kukengela kwage wenyene nu ku mponga zage zatukasile mu Kristo Yesu lwabusio lwa nkiko za wakalazi. 10 Tondo kano kaluma atulolesiziezo ku kumoneka kwa Mukuluzi weitu Yesu Kristo. Kubuno Yesu Kristo akindile lukuo, nu kubisula kalamo nu kutakua ku nzila za Musagu Musoga.
11 Kalaga ankasile mulimo wa kusambala wono Musagu Musoga, anga musingwa nu musozi. 12 Ku kabamba kago nkubabazibwa, tondo nsikukua na nsoni kubuno nizi wozo u nakatizizie nu nkumenya nunse buno anavwama kulanga kikyo kinamukasile aaba nu kwika ku busi bubo. 13 Kokomezia kalolesio k'idagi lya bulili lyungule kundi mu bukatizio nu lutundo luli mu Kristo Yesu. 14 Langa meigisia ma bulili mawakasilwe mu Muuza Wasililila ukwikalaga mutuli.
15 Wizi musagu wono buno bansania beli mu kisi kya Asia bansigile, bamozi mu bo beli Figelo nu Hermogene. 16 Mukota alolesie kyombo kyage ku kikanga kya Onesiforo, kubuno andindizie mambizi meingi. Aba ntakule nsoni ku kabamba kane nne mukandwa, 17 tondo, gaabasile ku Roma, andondile na komanizia nunse buno ammoneko. 18 Mukota amukwile kyombo mu busi bubo! Wizi busoga nunse ku milimo insania zankitide ku Efeso.