TITO
Kusambizania
1
1 Paulo, mukiti wa Kalaga, nu musingwa wa Yesu Kristo, ku kabamba ka bukatizio bwa basombolwa ba Kalaga nu ku bumenyinino bwa bulili buli mu kwanza Kalaga nunse, 2 buli mu kilemanizio kya kalamo katanakuzinda kalagilwe na Kalaga lwabusio lwa nkiko insania za wakalazi, nu We ntakwekaga buza, 3 nu abiswide idagi lyage ku nkungu zage mu busambazi bunakasilwe ku ikakizio lya Kalaga Monia weitu, 4 ku Tito, mwana wane wa bulili mu bukatizio bweitu bumozi: mponga nu bubobelelo bikutukaga ku Kalaga Isi nu ku Mukota Yesu Kristo Monia weitu bibe kuguli! Mulimo Wakasilwe Tito ku Krete
5 Nakusigile ku Krete buno ulongeke bitondo byasigede ku kulongekwa, nu buno ubike bakulu mu mwino na mwino kuyangana anga bunakukakizizie, 6 ndi kuli muntu uteli na lukumu lubi, wamulume wa mukikulu umozi, uli na bana bakatizia, batakulumbibwa ku bubi, ku butazi aba ku kutanza. 7 Kubuno bwatunganana buno mukulu wa kanisa ntabe na lukumu lubi, kubuno eli mukiti mulangi wa bitondo bya Kalaga, ntabe muntu wa lwikotio, aba ntabe muntu wa kusasia kongoa, aba mulwani, nu ntanue maku, aba mwelami wa bikulo bya mutali utaswaga; 8 tondo abe muntu wa kusekela bageni, kilemba kya bantu basoga, muntu wola, muntu wisanana, muntu wasililila, muntu wa kwisungula, 9 wikokomezia ku idagi lya bulili anga buligisizibwe, buno livwame kwana bantu mu meigisia masoga nu kukinda babo beli na myango.
10 Kubuno kuli beingi batakwanza nunse, kwitila nunse beli munkatini mwa bamonesibwa, bakutenda bitondo bitakulungana nu bengelezi, 11 babo batunganana kukanda tunua twabo, kubuno bakulubikania bikanga bigimagima nu bakwigisia bitondo bibatatunganana kwigisia ku kabamba ka mutali. 12 Umozi wa kubeli, mulengania wabo bobenyene abwide bunee: “BaKrete beli bantu ba buza bindi binsania, nyama mbi, biliagundu batakukita mulimo.” 13 Bulongeki bubuno buligo. Ku kabamba kakano, bazugile nunse buno babe na bukatizio busoga, 14 nu tabongwilile misumo za baYuda nu makakizio ma bantu bakwida bulili mugongo. 15 Binsania bili bisoga ku babo beli basoga; tondo ku babo beli babi nu batakatizia, takuli kyampa kili kisoga; kubuno menge mabo nu kalenganio kabo bili na nsese. 16 Bakutenda bwasibwasi buno beizi Kalaga, tondo ku makitilo mabo bakumutuna, nu beli basombi, nu banani, nu batakuvwama kukita mulimo wampa musoga.