FILEMONA
Kusambizania
1
1 Paulo, mukandwa wa Yesu Kristo, nu mubuto weitu Timoteo, ku Filemona mutundwa weitu nu mukiti muneitu, 2 nu ku mubitu weitu, nu ku Apia, nu ku Arkipo, mukoloboyo muneitu, nu ku kanisa keli mu numba zobe: 3 mponga nu bubobelelo bibe kumuli kutuka ku Kalaga Tateiswe nu ku Mukota Yesu Kristo! Lutundo nu Bukatizio bwa Filemona
4 Nkusimaga Kalaga wane bindi binsania nu nkukukengelaga mu masego mane, 5 kubuno nkungwaga ku musagu wa bukatizio bwobe mu Yesu Kristo Mukota, nu ku lutundo lwobe ku basililila bansania. 6 Nkusega buno usambale bukatizio bwobe buno ube na bumenyinino bwa bitondo binsania bituli nabyo mu Kristo. 7 Kubuno lutundo lwobe lwambogeziembogezie nunse, nu lwankasizie nunse, kubuno uwe, mubuto wane, wabobelezia mitima za basililila.
Paulo Akukita Isego ku Kabamba ka Onesimo
8 Ku bubo, aba nagugumana mu Kristo, ku kukakizia kikyo kiwatunganana kukita, 9 tondo buli busoga buno ku kitondo kya lutundo u kunkukusega nunse, anga buniseli mukungu, nne Paulo, nu kano kaluma mukandwa wa Yesu Kristo. 10 Nkukusega nunse ku kabamba ka mwana wane Onesimo, u nabutile mu kikando, 11 wono, ku nkungu za wakalazi ntabede na mutali kuguli, tondo kano kaluma eseli na mutali kuguli nu kundi.
12 Namusubya lingo kuguli, we uli anga mutima wane nnenyene. 13 Ninatundile kumulanga mu ntungo zane buno ankitile mulimo anga bunagukitile mu nkungu zinili mu kikando ku kabamba ka Musagu Musoga. 14 Tondo nsyatundile kukita kampa geteli uwe kwitabizia, buno busoga bwobe tabube bwa kusindikwa, tondo bube bwa lutundo.
15 Kubuno embe ku bubo alekanukizibwe nobe ku bindi bimozi, buno wikale lingo nage bindi binsania, 16 ta anga mukobe lingo, tondo anga wasakama kutinga mukobe, anga mubuto wobe mutundwa nunse, nu kwitila nunse kwobe, aba mu mubili aba mu Mukota.
17 Umpanga ndi ukunkata buno nili kilemba kyobe, kasi musekele anga nnenyene. 18 Nu ndi akwagide, aba ndi eli na nsombi kwobe, nti wazibika kundi. 19 Nne Paulo, nagusanza na maboko mane nnenyene, nne nalige. Nsikukutenda buno uli na nsombi kundi, aba ku uwenyene. 20 Ee mubuto wane, nibe na mutali wono kuguli mu Mukota; bobelezia mutima wane mu Kristo.
21 Kubuno nkukukatizia ku lwanzo lwobe ukinsa nakusanzila, nu nizi buno wakite bwatinga nunse bubo bunkutenda. 22 Gamozi na bibyo bitondo wambikila kiziki kya kwikala kayikayika, kubuno ku masego meinyu, nkulemanina nivwe kweinyu.
Kusambizania Kuzinda
23 Epafra, mukandwa munane mu Yesu Kristo, akusambizia, 24 nu Marko, nu Aristarko, nu Dema, nu Luka, bakiti banane na mulimo.
25 Mponga za Mukota weitu Yesu Kristo zibe gamozi na mitima zeinyu.