4
1 Nkukukakizia ku Kalaga nu ku Kristo Yesu, ukasungia balami nu bakuzi ku nkungu za kumoneka kwage nu bukota bwage, 2 sambala idagi lya Kalaga, nu ba kayikayika nkungu zatunganana aba nkungu zitatunganana, zugila, ana, sengezia ku kwikalila kunsania nu kwigisia. 3 Kubuno nkungu zikavwa bantu tabakaziga kungwa ku meigisia ma bulili, tondo bakayanga ntundo zabo bobenyene nu bakeidondela basozi beingi bakubeigisia meigisia mabakutunda kungwa. 4 Nu bo tabakongwilila ku bulili, nu kugalukila misumo za buza. 5 Tondo uwe, idange mu bitondo binsania, babazibwa, kita mulimo wa kusambala Musagu Musoga, sililizia mulimo wobe unsania. 6 Kubuno nne, nise nikasana anga kisansa, nkungu za kukua kwane zise bwigi. 7 Nitenne bita bisoga, nasilile kantangoa kane, nalangile bukatizio. 8 Kano kaluma nabikidwe lukalilo lwa bukindi, u lukalilo lwa kwisanana, lukankasa Mukota musungia wisanana ku busi bubo, aba ta nnenyene tugu, tondo ku bansania bakutunda kumoneka kwage.
9 Vwa kundi yiliyili. 10 Kubuno Dema ansigile, atundile bitondo bya nkiko zeno za kano kaluma, nu endile ku Tesalonika, nu Kreske endile ku Galatia nu Tito endile ku Dalmatia. 11 Luka wenyene u nili nage. Wavwa na Marko, kubuno akunkasagia busoga. 12 Nasingile Tikiko ku Efeso. 13 Gawavwe, nti wavwa n'ikoti linasigile ku Troa kwa Karpo, nu bigondi bya mikanda, tondo lebelebe bibyo bya bikoba.
14 Alesanduro, mutumbi wa byuma, ankitide bubi bwingi, Mukota akamusungia ku bitondo byankitaga, 15 nu uwe, widange na wono, kubuno abengile nunse meigisia meitu.
16 Ku mulondo wane mutangi takwabezaga muntu wantendede, tondo bansania bansigile. Kalaga ntabakengelele ku bubo! 17 Tondo Mukota abezaga gamozi na nne nu ankasile magala ma kusambala idagi buno baBilongo bansania bongwe. Nu nonezibwe mu kanua ka nsimba. 18 Mukota akanonia ku bubi bunsania nu akambika bulonge bukata mu bukota bwage bwa Mwigulu. Kweli kuli lutanuno luteli na kuzinda. Amena.
Kusambizia Kuzinda
19 Nsambizie na Prisila nu Akila nu kikanga kya Onesiforo. 20 Erasto asigede ku Korinto, nu nasigile Trofimo ku Mileto kubuno abezaga musambi. 21 Sasia kubasa lwabusio lwa mpego. Eubulo, nu Pude, nu Lino, nu Klaudia nu mibuto zeitu insania zikukusambizia.
22 Mukota Yesu Kristo abe gamozi n'inyuwe. Mponga za Kalaga zibe gamozi n'inyuwe.