Mu Bindi Bizinda
3
1 Tondo menya buno mu nkungu nzinda kukaba bindi bibibu, 2 kubuno bantu bakeiyelama bobenyene: nu bakaba belami ba bikulo, nu beiganuzi, nu beiya kwikotia: nu balingani, nu batakwanza babuti babo, nu beteli na lusimo nu bataswaga; 3 nu tabakutunda ba kwabo, tabakutunda kusigilila bango, beli bakandiki, tabakwisungula, nu bakali, tabakutunda busoga, 4 bakaba bagabuzi, bakaba na kasaswe k'itenda, bakeikotia, nu bakatunda meiya kutinga Kalaga. 5 Bakumoneka buno bakukua Kalaga boba, tondo bakutuna magala mage. Ibembukye na bantu babo. 6 Kubuno bamozi ku babo bakwingila mu numba za bantu, nu kwenda na bakikulu bikongolo beli na mibi, bakusondelezibwa na ntundo mbi za nkita ningi, 7 bakwigisibwa bindi binsania, tondo tabanavwama kumenyinina bulili. 8 Anga Yane nu Yambure babengile Musa, u bubo bantu babano bakubenga bulili; kubuno balubikenne menge mabo, nu ku kitondo kya bukatizio bwabo tabeitabizizibwe. 9 Tondo tabitile nunse, kubuno bukongolo bwabo bwamenywe na bantu bansania, anga bwabezaga bukongolo bwa Yane nu bwa Yambure. Makakizio Mazinda
10 Tondo uwe wayangile nunse meigisia mane, nu makitilo mane, nu makengelo mane, nu bukatizio bwane, nu kwikalila kwane, nu lutundo lwane, nu nkiki zane, 11 nu lusungio lwane nu tubebe twane, u bitondo binabezaga nabyo ku Antiokia nu ku Ikonio nu ku Listra. Bitondo bibino byambaside, tondo Mukota anonezie ku binsania. 12 Nu bansania bakutunda kulama kalamo ka kutananizia Kalaga mu Yesu Kristo, basungibwe. 13 Tondo bantu babi nu tumanwa bakwitilaga kukita bubi, bakengelela nu bo bakengelelwa. 14 Tondo uwe kita anga bubo buwigisizibwe, nu bubo buwakatizizie nu kumenya nunse nazi musozi wakwigisizie bubo. 15 Lingo, kutukila bwana bwobe wamenyine Masanzo Masililila, manavwama kukukasa menge ma konibwa ku bukatizio buli mu Kristo Yesu. 16 Masanzo mansania mopidwe na Kalaga, nu meli masoga ku kwigisia, nu ku kuzugila, nu ku kusungula, nu ku kwana kwisanana: 17 buno muntu wa Kalaga alinde, nu aswage ku mulimo na mulimo musoga.