Mukoloboyo Mukatizia wa Kristo
2
1 Umpanga, uwe mwana wane, ba na magala mu mponga zili mu Kristo Yesu. 2 Nu bitondo byungule kundi lwabusio lwa balongeki beingi, igisiabyo ku bantu bakatizia, bakavwama kwigisiabyo ku bango. 3 Babazibwa gamozi na nne anga mukoloboyo mukatizia wa Yesu Kristo. 4 Takuli mukoloboyo ukwitana bita ukwibika mu bitondo bya kisi, ndi akutunda kutananizia mukota wage wa mulimo. 5 Aba muntu ndi akwenda kantangoa, ntanakaswa nkumbu kungwa ntatanga munyage mu kuyanga milembe. 6 Mulimi ukubabazibwa nunse na mulimo atunganana kuba mutangi kulia ku biguma byakulimina. 7 Kengela bubuno bunkutenda, kubuno Mukota akukase bumenyinino mu binsania.
8 Kengela buno Yesu Kristo ayukile kutuka ku bakuzi, wa kikanga kya Davidi, anga bukutenda Musagu Musoga wane. 9 Mu kusambala Musagu Musoga u munkubabazibwa nu kukandwa anga mwagi, tondo idagi lya Kalaga talikukandwa; 10 ku bubuno nkwikalila binsania ku kabamba ka basombolwa na Kalaga, buno nu bo babe na lonio nu lutanuno luli mu Yesu Kristo. 11 Bitondo bibino bili bya bulili bunee:
“Ndi twakule gamozi nage nti twalamage lingo
gamozi nage.
12 Ndi twikalila nti tukangata gamozi nage: ndi
twamutuna, nu We nti akatutuna;
13 Ndi tatuli bakatizia, We nti eli mukatizia,
kubuno ntanavwama kwituna We wenyene.”
Mukiti Musoga
14 Bakengelezie bibino binsania nu kubana ku Kalaga buno tabakananie ku bitondo bitakulungana. Kubuno bitondo bya nsake tabili na mutali, tondo bikubigia mitima za babo bakubyungwilila. 15 Ikokomezie buno witabizibwa na Kalaga, mukiti wa mulimo utakukua na nsoni ku mulimo wage, ukwisula bwisanana idagi lya bulili. 16 Ibembukye na bitondo bitaswaga nu byengukana na bukatizio, kubuno bitondo bibino bikugalukya bantu buno tabanze Kalaga. 17 Bitondo bibakwigisia byabe anga kyulu kikulia mubili. Bamozi mu bo beli Himeneo nu Fileto. 18 Babano basigile bulili nu bagalukizye bukatizio bwa bango bantu ku kutenda kwabo buno iyukilo lyatingile kalazi. 19 Tondo kibanza kya Kalaga kili kibibu nu kyemana, kyabikilwe kamenyikilo: “Mukota eizi beli bage,” nu “Muntu unsania ukutenda buno eli wa Mukota Yesu, atunganana kusiga bubi.”
20 Tondo mu numba nnene, tamuli nyungu za olo nu za feza tugu, tondo nu za miti nu z'ibumba. Imozi zili za lwanzo nu zingo tazili na lwanzo. 21 Umpanga ndi muntu eiyengia nu kwidekanukya na bubi nti akaba anga nyungu za lwanzo, zaswagibwa, zatananina Mukota, zalongekwa ku mulimo na mulimo guli musoga. 22 Tondo siga ntundo za bwana buto, nu uyange kwisanana, nu bukatizio, nu lutundo, nu bubobelelo gamozi na babo bakusegaga Mukota na mitima misoga. 23 Tondo somba mbuzio za bukongolo nu ziteli na menge, kubuno zikulusia nsake, 24 nu mukiti wa Mukota ntatunganana kusaka, tondo abe wola ku bantu bansania, ukuvwama kwigisia nu uli na nkiki, 25 ane babo bakumwenzia myango, embe Kalaga abagalukye buno beiyanie aba nu kumenyinina buligo. 26 Bubo babe na bumenyinino nu kutuka mu itega lya Satana, wabakandile buno bayange lutundo lwage.