6
1 Bakiti bansania banze bakota babo nunse, buno izina lya Kalaga nu meigisia meitu tamabengwe. 2 Bakiti beli na bakota bakatizia tabababenge ku kitondo kya buno beli mibuto zabo. Kasi batunganana kubakitila busoga nunse kutinga, kubuno babano beli batundwa babo nu mibuto zabo mu bukatizio. Igisia bitondo bibino nu kubyana. 3 Ndi muntu eigisia mango meigisia, nu ntakwitabizia idagi lya bulili lya Mukota weitu Yesu Kristo, nu meigisia matunganana na meigisia ma bulili, 4 nti akwikotia, tondo nteizi kena. Akutunda kubuzia mbuzio za myango, ku bitondo bibino u kukutukaga lugi, nsake, bilingano, nu kukengela bubi, 5 nu myango za bukongolo za bateizi bulili, bakukengela buno kwanza Kalaga kuli mutali wa kisi. Idekanukie na bantu ba lukita lulo. 6 Tondo kwanza Kalaga na mbogimbogi kuli mutali munene. 7 Kubuno tatwavule na kena mu kisi kikino, nu tatunavwama kutuka na kena. 8 Tondo ndi tuli n'idia nu nsulu, tubogeboge nabyo. 9 Tondo babo bakutunda kuguma bakukoloka mu malindiko, mu matega, nu mu ntundo ningi za bukongolo zikwita nu zikwenzia bantu mu buzimizi nu lukuo. 10 Kubuno kulinga kwa bubi bunsania kuli kwelama bikulo: nu bamozi ku kubyelama, basigile bukatizio, nu babede na tubebe twingi. 11 Tondo uwe, muntu wa Kalaga, tina bitondo bibino nu uyange kwisanana, nu kwanza Kalaga, nu bukatizio, nu lutundo, nu nkiki, nu kola. 12 Lwana bita bisoga bya bukatizio, kokomezia kalamo katanakuzinda, kawamaninwe muko nu kawitabizizie lwabusio lwa beingi. 13 Nkukukakizia bitondo bibino ku Kalaga ukulamagia binsania, nu ku Kristo Yesu, walongekile bulongeki bwage busoga lwabusio lwa Pontio Pilato, 14 buno ulange kukakizia kukuno, geteli itondoki nu kabalibango aaba nu gamoneke Mukota weitu Yesu Kristo. 15 Ku nkungu zage, akalolesibwa na Kalaga We wenyene, uli na lutanuno nu bwangato bunsania, Mwangati wa bangati, Mukota wa bakota, 16 We wenyene uli na kalamo katanakuzinda, ukwikalaga mu kyengi kitanakunda ku muntu. Takuli muntu wamumonineko aba unavwama kumumonako. Lwanzo nu magala bitanakuzinda bibe kweli! Amena.
17 Kakizia beli bagumi mu nkiko zeno, buno tabeikotie, aba tabalemanine bugumi butakwizizia, tondo balemanine Kalaga ukutukasaga binsania buno tubogeboge nabyo. 18 Basengezie buno bakite busoga nu babe bagumi ku makitilo masoga, babe kayikayika kukasana bikulo byabo nu kukasia bango. 19 Ndi bakita bubuno, nti beibikila isuku lya kalingilo kasoga ku nkungu zikavwa, u kuba na kalamo kasoga.