Mulimo wa Bakatizia
5
1 Ntuzugile mukungu, tondo mwane anga so, nu ana basikila anga bato bobe; 2 nu bakikulu bakungu anga banyoko, nu bakinga anga babitu bobe mu kwisanana kunsania. 3 Anza misigala zili misigala za lebelebe. 4 Tondo ndi musigala eli na bana aba bayukulu nti balinge kulanga kikanga kyabo bobenyene, nu kukunga bababuta busoga, kubuno bubuno bwaswaga ku Kalaga. 5 Tondo wozo uli musigala wa lebelebe eli wozo mukikulu uteli na ungo mukasia, akulemanina Kalaga nu eli na komanizia mu masego nu kusega musi nu kindi. 6 Tondo musigala ukulama mu ntundo za kisi, nti asila kukua aba eikili na kalamo. 7 Kakizia bitondo bibino buno tababe na kabalibango. 8 Ndi muntu ntakulanga mibuto zage nu ba kikanga kyage, wono nti akutuna bukatizio nu nti eli mubi kutinga wozo utakatizia.
9 Musigala ntasanzwe ndi myaka zage tazakuka makumi mutuba, nu we abezaga mukikulu wa wamulume umozi tugu, 10 nu we alumbibwe na misako misoga, ndi akuzizie bana nu ndi asekede bageni, nu ndi ogezie magulu ma baswagibwa, ndi akasagia bababalagwa nu ndi ayangile kitondo na kitondo kisoga.
11 Tondo ntusanze misigala ziteli bakungu, kubuno ndi ntundo zabo mbi zabasindika ku kusongwa, nti basige Kristo, 12 nu ku bubo nti basila kwaga, kubuno beidekanukia na bukatizio bwabo butangi. 13 Nu lingo bakwibika basosu, nu bakutingatinga ku numba na numba, aba ta basosu tugu, tondo balabazi nu bakusongekania bango, nu bakutenda bitondo bitakulungana. 14 Ku bubo nkutunda misigala beikili bakinga basongwe, babute bana nu bakite milimo ku numba zabo, buno mwiti weitu ntabalingie. 15 Kubuno bamozi bese basila kugaluka nu kuyanga Satana. 16 Tondo ndi wamulume aba mukikulu mukatizia eli na misigala ku kikanga kyage, azikasie buno kanisa takabe na mulimo wa kuzilanga, buno kavwame kukasia babo beli misigala za lebelebe.
17 Bakulu tugu bakusondelezia kanisa busoga batunganana kwanzwa mambizi mabili nunse, nu lebelebe babo bakusambala musagu musoga nu kwigisia. 18 Kubuno Masanzo makutenda bunee: “Ntukande kanua ka ngombe gazikunyanta ngano.” Nu lingo, “Mukiti wa mulimo atananina kuligwa ku mulimo wage.” a 19 Ntuzige mukulu asongelwa, umpanga ku bulongeki bwa bantu babili aba basatu. 20 Zugila bansania bakwaga lwabusio lwa bantu bansania, buno bango bakue boba.
21 Nkukukakizia lwabusio lwa Kalaga nu lwa Mukota Kristo Yesu nu lwa banzelo basombolwa, buno wanze kukakizia kukuno, ntusombe umozi nu kukutya ungo. 22 Ntusasie kubika maboko ku muntu ku kumukasa mulimo mu kanisa. Aba ntugomie na bango bantu mu misako zabo za bwagi, tondo idange uwenyene busoga.
23 Ntunuage mazi kankanka, tondo nti wanua mazi makeke ma biguma ku kabamba ka nda zobe nu nsambo ziukusambaga nazo mambizi meingi.