Basozi ba Buza
4
1 Muuza Wasililila akutenda bwasibwasi buno, ku bindi bizinda, bantu bamozi beidekanukie na bukatizio bwabo, kungwilila myuza za bwengelezi nu meigisia ma basumbu. 2 Bakwengelelwa na bantu bakwekaga buza, tulenganio tuse twasiswa na kyuma. 3 Bantu babano bakwigisia buno bantu tabasonge, nu kubakakizia kugila idia lyabumbilwe na Kalaga likatwe ku kusima na babo bakukatizia nu bakumenya bulili. 4 Na kibumbwa na kibumbwa kya Kalaga nti kisoga, aba takuli kinasombwa, ndi kyakatwa ku kusima Kalaga, 5 kubuno kyaswagibwa n'idagi lya Kalaga nu kusega. Mukiti Musoga wa Yesu Kristo
6 Kungwa wakengelezia mibuto zeitu bitondo bibino, nti wabe mukiti musoga wa Yesu Kristo, nu nti walolesia buno wagomia na bitondo bya bukatizio nu bulili ku meigisia mawigisizibwe. 7 Tondo somba misumo za bakungu ba bakikulu.
Ikokomezie ku kwanza Kalaga. 8 Kulonda magala ma mubili kuli mutali mukeke, tondo kalamo ka kutananizia Kalaga kwatinga bitondo binsania, kubuno tuli n'idagi lya kalamo ka kano kaluma nu lya kako kakaba. 9 Kitondo kikino kili kya bulili, nu kyatunganana kukatizibwa na bantu bansania. 10 Ku bubuno tukukita mulimo nu tukulwana, kubuno, tukulemanina Kalaga mulami, uli Monia wa bantu bansania, tondo lebelebe wa babo bakatizia.
11 Bitondo bibino ubikakizie nu ubigisie. 12 Muntu ntakubenge buno uli mwana, tondo ube kalolesio ku babo bakatizia, mu kutenda nu mu mwendezi nu mu lutundo, mu bukatizio nu mu kwisanana. 13 Aaba nu ganavwe, ba na komanizia ku kusoma Masanzo Masililila ku kwana nu ku kwigisia. 14 Ntusige lukaso luguli nalo, luwakasilwe gawabikidwe maboko na balengania nu bakulu. 15 Ukengele bitondo bibino, wikale mubyo buno misako zobe ziswage ku bantu bansania. 16 Idange uwenyene ku meigisia mobe, nu wikale mu bitondo bibino. Kubuno ku kukita bubuno, wiyonie uwenyene nu wonie babo bakungwa ku meigisia mobe.