Balangi ba Kanisa
3
1 Kitondo kikino kiligo, ndi muntu akutunda kuba mulangi wa kanisa nti atunda mulimo musoga. 2 Mulangi wa kanisa atunganana kuba muntu uteli na lukumu lubi, wamulume wa mukikulu umozi tugu, ukwizugila, wola, uli na misako misoga, musekezi nu musozi wa lebelebe: 3 ntanue maku, aba ntabe mulibuzi, tondo muntu wola nu kutunda bubobelelo, nu ntabe muntu widamba bikulo: 4 atunganana kuba muntu ukusondelezia kikanga kyage busoga nu ukwanzwa na bana bage busoga, 5 kubuno ndi muntu ntakusondelezia kikanga kyage busoga, buni bwanavwama kusondelezia Kanisa ka Kalaga? 6 Ta muntu muto mu bukatizio; kubuno anavwa kuba na lwikotio nu kusungibwa anga bwasungizibwe Satana. 7 Atunganana nunse alumbibwe busoga na bantu batakatizia, buno ntabe na lukumu lubi nu kukatwa mu matega ma Satana. 8 Nu bubo ku bakulu ba kanisa babe bola, nu ta babe na matendelo mabi nu ta bantu ba kunua maku, nu ta bantu bakwelama bikulo bya nsese. 9 Batunganana kukokomezia keinda ka bukatizio mu kalenganio kasoga. 10 Batunganana tanga kulindikwa, nu kusila ndi tabamoneka na lukumu lubi, nti banavwama kukita mulimo anga bakulu ba kanisa. 11 Bakikulu babo nu bo batunganana kuba na lwanzo, ta bakandiki, tondo beiya kwizugila nu bakatizia mu bitondo binsania. 12 Bwatunganana mukulu wa kanisa abe na mukikulu umozi tugu nu abe wozo ukusondelezia bana bage babutwa nu kikanga kyage busoga. 13 Kubuno babo bakitile mulimo wa bukulu busoga bakwimonena kiziki kisoga, nu kilemanizio kinene mu bukatizio buli mu Yesu Kristo.
Keinda Kanene
14 Nakusanzila mukanda wono, tondo nkulemanina buno nasasie kuvwa kuguli. 15 Tondo ndi nizizia, nti mukanda wono unakukengelezia buni buwatunganana kukita mu numba za Kalaga, u Kanisa ka Kalaga uli mulami, iyango nu kibanza kya bulili. 16 Geteli myango, keinda kakano ka bukatizio bweitu keli kanene!
Kalaga weitu amonekile mu mubili,
Abingizibwe mu Muuza;
Nu amonekile na banzelo,
Asambedwe ku baBilongo;
Akatizizibwe mu kisi,
Nu ekilwe Mwigulu.