Makakizio ku Kitondo kya Masego
2
1 Umpanga lwabusio lwa binsania, nkukakizia buno musege Kalaga, nu kusega na komanizia, nu kusima, nu kusegela bantu bansania. 2 Bwatunganana kusegela bakota nu bansania beli na bwangato, buno tulame mu bubobelelo nu kola, gamozi na kalamo ka kutananizia Kalaga mu kwisanana kusoga. 3 Bubuno buli busoga nu bukutananizia Kalaga Monia weitu, 4 ukutunda bantu bansania bonibwe nu kumenya buli bulili. 5 Kubuno kuli Kalaga umozi tugu, nu mukulumania umozi gasamba Kalaga nu bantu, muntu wono u Yesu Kristo, 6 Wikasenne wenyene buno akulule bansania, u bulongeki bwalongekilwe gakukile nkungu. 7 Ku bubo nabikilwe kuba musambazi nu musingwa, (nkutenda buligo, nsikweka buza) musozi ku baBilongo kusambala musagu wa bukatizio bwa bulili. 8 Umpanga nkutunda bamulume basege ku kiziki na kiziki, kulambya maboko masililila geteli bongoa aba myango.
9 Nkutunda bakikulu nu bo beidebye na nsulu zabatananina gamozi na lwanzo nu mitima za kwisungula, ta ku kuswika nzwili, aba olo, aba makozi ma bukunza bubibu, aba nsulu za bukunza bubibu, 10 tondo ku misako misoga anga bwatananina bakikulu bakwanza Kalaga. 11 Bwatunganana bakikulu beige mu kibibi, gamozi na lwanzo. 12 Tondo nsyakasa mukikulu bwangato bwa kwigisia, aba bwa kwangata wamulume, tondo eikale kibibi. 13 Kubuno, Adamu u walingile kubumbwa, nu kusila Eva. 14 Nu ta Adamu u wengeledwe, tondo mukikulu u wengeledwe nu agile, 15 tondo akonibwa mu kubuta mwana, ndi eikala mu bukatizio, nu lutundo nu kusililila, gamozi na mutima wa kwizugila.