Mutusegele
3
1 Mibuto zeitu, ku bibyo byasigala, mutusegele, buno idagi lya Kalaga libalangane nu liganunwe, anga bulili kweinyu, 2 nu buno twonibwe kutuka na bantu babi nunse nu beteli ba bulili; kubuno ta bansania u beli na bukatizio. 3 Tondo Mukota eisanana, amulindie nu amulange na wozo mubi. 4 Tuli na bukatizio mu Mukota, ku kabamba keinyu buno mukukita bitondo bitukumukakizia nu lingo buno mwabikite.
5 Nu Mukota asondelezie mitima zeinyu ku nzila za lutundo lwa Kalaga nu ku nzila za kwikalila ku kabamba ka Kristo.
Mutali wa Kukita Mulimo
6 Mibuto, tukumukakizia, mu izina lya Mukota weitu Yesu Kristo, buno mwidekanukye na mibuto insania zikulama mu bitondo biteisanana nu zitakuyangana na meigisia matwamwigisizie. 7 Inyuwe mwizi lukita lumwatunganana kutususania mulo, kubuno tatwamulubikanizie. 8 Tatwalide idia lya muntu wampa buliabulia; tondo mu mulimo nu mu mbabazio, twakitile mulimo musi nu kindi buno tunavwa kubika buzitu ku muntu unsania wa kumuli. 9 Ta kubuno tatuli na bwangato bubo, tondo twatundile kumukasa tubenyene kalolesio ka bumunatuyanga. 10 Kubuno, nkungu zitwabezaga kweinyu, twamukakizizie kitondo kikino bunee: “Ndi muntu ntakutunda kukita mulimo, kasi ntalie idia.”
11 Kubuno, tukungwa buno kumuli kuli bantu bamozi bakulama mu bitondo biteisanana nu tabakukita mulimo wampa, tondo bakwibika mu bitondo bya bango bantu. 12 Umpanga ku babo bantu tukubakakizia nu tukubasega nunse mu Mukota Yesu Kristo, buno bakite mulimo mu bubobelelo, nu balie idia lyabo libakukita bobenyene.
13 Tondo inyuwe, mibuto, tamukutwe na kukita busoga. 14 Nu ndi muntu umozi ntakwanza butukutenda mu mukanda wono, nti mwamumenyinina, nu tamugomie nage, buno abe na nsoni za bubo. 15 Tamumukengele anga buno eli mwiti, tondo mumwane anga mubuto.
Mponga nu Kusambizania
16 Kano kaluma, Mukota wa bubobelelo wenyene amukase bubobelelo mu nkungu insania, ku nkita insania! Mukota abe gamozi n'inyuwe bansania!
17 Namusambizia, nne Paulo ku kuboko kwane, nnenyene. Bubuno buli kakengelezio kane mu mikanda zane insania, u bubo bunikusanzaga:
18 Mponga za Mukota weitu Yesu Kristo zibe gamozi n'inyuwe bansania!