3
1 Ku bubuno, nkungu zitutavwamaga lingo kwikalila ku bubo, twatundile buno tusigale tubenyene ku Athene, 2 nu twasingile Timoteo, mubuto weitu, mukiti wa Kalaga, mu mulimo wa Musagu Musoga wa Kristo, buno amulindie nu amubobelezie ku kabamba ka bukatizio bweinyu, 3 buno muntu wampa ntazangibwezangibwe mu mbabazio zeno, kubuno inyuwe mubenyene mwizi buno twabikilwe ku bibino. 4 Nu gatwabezaga gamozi n'inyuwe, twalingile kumusambalila buno twabe na mbabazio, nu bubo u bwabede, anga bumwizi. 5 Mu kuba nsikuvwama kwikalila ku bubo, nasingile Timoteo buno nimenye bukatizio bweinyu ku boba buno mulindiki anavwa kumulindika nu mulimo weitu nti waba buliabulia. 6 Tondo gatukile Timoteo kweinyu nu kubasa kutuli, atusambalide misagu misoga za bukatizio bweinyu, za lutundo lweinyu, za kutukengela bindi binsania, nu za buno mukutunda kutumonako, anga butukutunda nu iswe kumumonako. 7 Ku bubo, mibuto, mu mbabazio zeitu nu nsungio zeitu, twabobelezizibwe ku misagu zeinyu, ku kabamba ka bukatizio bweinyu. 8 Kano kaluma tukulama ndi mwemana na magala mu Mukota. 9 Kubuno kusima kukizi kutunavwama lingo kusima Kalaga ku kabamba keinyu, ku mbogimbogi insania zitukubogaboga ku kabamba keinyu lwabusio lwa Kalaga weitu! 10 Tukusegaga nunse na magala, musi nu kindi, buno atukase bwangato bwa kumumonako, nu kumutalikila bibyo bimwidile ku bukatizio bweinyu.
11 Umpanga Kalaga wenyene, Tateiswe, nu Mukota weitu Yesu asondelezie nzila zeitu buno tubase kweinyu! 12 Mukota amukuzie nu atalike lutundo kumuli bweinyubweinyu nu ku bantu bansania anga butuli nu iswe nalo kumuli; 13 buno alindie mitima zeinyu buno tazibe na lukumu lubi mu kusililila lwabusio lwa Kalaga Tateiswe, ku nkungu za kuvwa kwa Mukota weitu Yesu gamozi na basililila bage bansania.