Musako Ukutananizia Kalaga
4
1 Ku bibyo byasigala, mibuto zeitu, tukumusengezia, nu tukumwana mu Mukota Yesu, anga butwamwigisizie lukita lumwatunganana kutabanga mulo nu kutananizia Kalaga, buno mwitile nunse kutabanga mu lulo lukita bindi binsania. 2 Kubuno mwizi makakizio makizi matwamukakizizie kutuka ku Mukota Yesu. 3 Bubuno u kusombola kwa Kalaga, u kusililila kweinyu, buno mwibembukye na butazi; 4 buno na muntu na muntu kumuli amenye kwangata mubili wage mu kusililila nu mu lwanzo; 5 ta ku kwikasana ku lukita lwa lutundo lubi anga bukukita baBilongo beteizi Kalaga; 6 buno muntu wampa ntakite bubi ku mubuto wage, aba kumukanga mu kitondo kikino, kubuno Mukota ukusubaga bitondo bibino binsania, anga butwalingile kumusambalila nu kumulongekela. 7 Kubuno Kalaga ntatumanine ku bubi, tondo ku kusililila. 8 Umpanga wozo ukusomba makakizio mamo, nti ntakusomba muntu, tondo Kalaga, nti u wakusomba Muuza wage Wasililila. 9 Ku kitondo kya kutundana, mibuto zeitu, tamukwiyanina buno tumusanzile, kubuno inyuwe mubenyene mwigisizibwe na Kalaga buno mutundane bweinyubweinyu; 10 nu bubo u bumukukita ku mibuto insania zili ku Makedonia. Tondo tukumusengezia, mibuto, buno mwitile kukita nunse bindi binsania mu lulo lutundo, 11 mwikokomeziazi buno mulame na bubobelelo, nu kukita bitondo byeinyu mubenyene, nu kukita milimo na maboko meinyu, anga butwamukakizizie, 12 buno mutabange na busoga lwabusio lwa babo beli kumbuga tamube na meiyanino ku muntu wampa.
Kuvwa kwa Mukota
13 Mibuto zeitu, tatukutunda buno mwiba misagu za babo bakule, munavwa kuba na tubebe anga bango beteli na kilemanizio, 14 kubuno ndi twakatizia buno Yesu akule nu ayukile kutuka ku bakuzi, ububo tukukatizia buno, babo bakule mu Yesu, Kalaga abalusie gamozi nage.
15 Kubuno, tukumutenda kuyangana n'idagi lya Mukota buno: beiswe basigala na kalamo aaba nu ku nkungu za kuvwa kwa Mukota, tatwatange babo bakule. 16 Kubuno Kalaga wenyene agele kutuka Mwigulu, n'iyuki lya mwanzelo munene nu monze wa Kalaga, nu babo bakule mu Kristo, balinge kuyukibwa tanga kutuka ku bakuzi. 17 Kusila, iswe basigede balami, twazanzulwe bansania gamozi nabo mu bimpa, ku kukulumana na Mukota mu mpelela, nu bubo tukabezaga gamozi na Mukota kankanka. 18 Umpanga, mubobelezanie ku bitondo bibino bweinyubweinyu.