4
1 Bakota, kitilazi bakiti beinyu bubo buli bulili nu bwisanana; menyazi tondo buno muli na Mukota Mwigulu. Nango Nsoga
2 Segazi na komanizia, nu kesiazi ntende mu masego nu simazi. 3 Tusegelazi nu iswe buno Kalaga atwigulile lwibi lwa kusambala Musagu wage, nu tutende keinda ka Kristo, kako kanakandilwe kuko. 4 Nu buno nisambale anga bunatunganana kutenda.
5 Endazi na menge lwabusio lwa babo batakatizia nu ikokomeziazi ku binsania bikumubasila. 6 Kutenda kweinyu kube na mponga bindi binsania, nu kulungwa na munkange buno mumenye bumwatunganana kwakula ku muntu na muntu.
Paulo Ekubasingila Tikiko nu Onesimo
7 Tikiko, mubuto weitu mutundwa, nu mukiti mukatizia, mukiti munane mu Mukota amusambalile misagu zane insania. 8 Namusinga kumuli ku kitondo kikino buno mumenye misagu zeitu, nu buno abobelezie mitima zeinyu. 9 Namusinga gamozi na Onesimo, mubuto weitu mutundwa nu mukatizia, eli muntu wa kweinyu. Bamusambalile misagu insania zikutinga gano.
Samba Nzinda za Paulo
10 Aristarko mukandwa munane amusambizia, nu Marko mwana wa mwizio wa Barnaba, (Namukasile makakizio ku kabamba kage buno ndi avwa kweinyu, nti mwamusekela). 11 Nu Yesu wamanagwa Yusto, amusambizia nu we. Munkatini mwa Bamonesibwa bobenyene umpanga u bankukita nabo mulimo ku Bukota bwa Kalaga, nubo bakumbobelezia.
12 Epafra, muntu wa kweinyu, mukiti wa Yesu Kristo, amusambizia. Bindi binsania akumusegela na komanizia buno mube bantu bagugumana nu basililila bakumenya kukita lutundo lunsania lwa Kalaga. 13 Kubuno nkumukatizia buno akwikasana nunse ku kabamba ka babo ba ku Laodikia, nu ku ba ku Hierapoli. 14 Luka, musakizi mutundwa weitu, nu Dema bamusambizia.
15 Nsambiziazi na mibuto zili ku Laodikia, nu na Nimfa, nu na kanisa kakukundamana mu numba zage. 16 Nu nkungu zimwasila kusoma mukanda wono, nti mwagusinga ku kanisa ka ku Laodikia buno bagusome nubo. Nu inyuwe nti mwasoma mukanda ukutuka ku Laodikia.
17 Tendazi ku Arkipo bunee: “Langa mulimo u wakasilwe na Mukota nu ugusililizie busoga.”
18 Samba kumuli, nne Paulo u wasanza na kuboko kwane. Kengelazi miyololo zane zankanda. Mponga zibe gamozi n'inyuwe!