Kalamo Kato mu Kristo
3
1 Umpanga ndi mwayukile gamozi na Kristo, londazi bitondo bya Mwigulu, kuko kukwikala Kristo ku kuboko kwa seidume kwa Kalaga. 2 Bikazi makengelo meinyu ku bitondo bili Mwigulu nu ta ku bibyo bili mu kisi. 3 Kubuno mwakule nu kalamo keinyu kabisilwe gamozi na Kristo mu Kalaga. 4 Gamoneke Kristo, uli kalamo keitu, u gago nu inyuwe mwamonekeko gamozi nage mu lutanuno. Kalamo ka Bumba Bukulu nu Kalamo Kato
5 Umpanga ku biganza byeinyu, itazi bili bya kisi: butazi, nsese, lutundo lubi, kwelama kubi, nu kutonia u kukumbamina nkisi. 6 Ku kabamba ka bitondo bibino, ukinsa bongoa bwa Kalaga bukuvwa gantata ga babo bakunana, 7 nu mu misako zeno nu inyuwe u mumwalingaga kutabanga muzo wakalazi, gamwalamaga mu bitondo bibino.
8 Tondo kano kaluma inyuwe nu inyuwe, lekanukazi na bitondo bibino binsania: bongoa, kasungu, kusuba, kukita mibi, kukandika, bitondo bya nsoni tabituke ku tunua tweinyu. 9 Tamwekane buza, kubuno mwatikizye muntu wa wakalazi nu makitilo mage. 10 Nu muse mwavwala muntu muto, wozo ukwikita kuba muto mu bumenyinino, anga kisusania kya wamubumbile. 11 Gano takuli muGriki aba muYuda, wamonesibwa aba utamonesibwa, mugeni aba wa kilongo, mukandwa aba mukandulwa, tondo Kristo eli binsania nu mu bansania.
12 Umpanga, inyuwe basombolwa ba Kalaga, nu baswagibwa, nu batundwa, mube na kyombo, mponga, kwibotya, kola, nu nkiki. 13 Mwikalilane bweinyubweinyu. Ndi muntu eli na kitondo ku ungo, sigililanazi bumuli na bumuli, anga bubo bwamusigilide Mukota, ububo nu inyuwe musigililane. 14 Nu kutinga bitondo bibino binsania, mube na lutundo, u mutandulwa wa kusililila. 15 Nu bubobelelo bwa Kristo bwangate mu mitima zeinyu, kubo mwamaninwe mu mubila umozi; nu mube bantu bakusima. 16 Idagi lya Kristo likale mumuli nunse mu menge mansania gamukwigisania nu gamukwanana bweinyubweinyu ku nimbo za baYuda ku nimbo za kuganuna, nu ku nimbo za Muuza, nu mwimbile Kalaga na mponga mu mitima zeinyu. 17 Nu ku kinsania kimukukita, ku kutenda aba ku kukita, kitazi binsania ku izina lya Mukota Yesu, nu musime Kalaga Isi mweli.
Ntondi za Lwanzo ku Bansania
18 Bakikulu, anzazi beiba beinyu, anga bwatananina mu Mukota.
19 Inyuwe bamulume, tundazi bakikulu beinyu, tamubalolesie kilungi kibi.
20 Bana, anzazi babuti beinyu mu bitondo binsania, kubuno kitondo kikino kili kisoga ku Mukota.
21 Inyuwe beisibo, tamusune bana beinyu, banavwa kukutwa.
22 Inyuwe bakiti, anzazi bakota beinyu mu bitondo binsania mu kino kisi, ta kukita tugu kungwa beligo, anga buno mutananizie bantu, tondo kukita na mutima waswaga mu kukua Mukota boba: 23 Kinsania kimukukita, kikitazi na mutima umozi, anga ku Mukota, nu ta ku bantu. 24 Ku bibino, menyazi buno ku Mukota mukakaswa bupieni anga lukalilo kubuno mukukitilaga Mukota Kristo. 25 Kubuno wozo ukukita bubi, akakaswa lukalilo lwage ku bubi bwakitaga nu ku Kalaga takuli kukutibwa kwa bantu.