Bana nu Babuti Babo
6
1 Bana, anzazi babuti beinyu mu Mukota, kubuno bubuno buli bulili. 2 “Kutya so nu nyoko” u ikakizio itangi lili n'idagano, 3 buno ube na mbogimbogi nu ulame bindi bingi ga kisi. 4 Nu inyuwe beisibo, tamulingie kusuna bana beinyu, tondo mubakuzie mu meigisia nu mu iyano lya Mukota.
Bakiti nu Bakota Babo
5 Bakiti, anzazi bakota beinyu ba gano ga kisi, bakuazi boba nu giliminazi na mutima waswaga, anga bumukwanza Kristo, 6 ta kukita tugu mu meiso mabo, anga bakutananizia bantu, tondo anga bakiti ba Kristo, bakukita kusombola kwa Kalaga na mutima musoga. 7 Kitazi mulimo na mutima musoga anga bakukitila Mukota, nu ta bantu, 8 menyazi buno na muntu na muntu akaswe lukaso ku Mukota ku busoga bwakitile, aba ndi eli mukobe aba ndi eli mukandulwa.
9 Nu inyuwe bakota, kitazi bubo ku bakiti beinyu, nu sigazi kubeitia boba, mumenye buno Mukota wabo nu weinyu eli mwigulu, nu kwage takuli kukutibwa kwa muntu wampa.
Ngabo za MuKristo
10 Umpanga ku kuzindilila, emanazi mu Mukota, nu mu magala ma bupuka bwage. 11 Vwalazi ngabo insania za Kalaga, buno muvwame kukinda bwenge bwa Satana. 12 Kubuno tatukulwana na mubili nu mikila, tondo tukulwana na makota nu mangato nu bangati ba kapilo ka kisi kikino, tukulwana na basumbu beli mu biziki bya mpelela. 13 Ku bubuno tolazi ngabo insania za Kalaga, buno muvwame kukinda mu bindi bibi, nu kusila kwa kusililizia binsania, mwemane.
14 Umpanga, emanazi, mwiswike mukoma wa bulili mu bibunda byeinyu; muvwale ngabo za kwisanana ku bukuba; 15 sosazi magulu meinyu mu bisalapata buno mube kayikayika kusambala Musagu Musoga wa bubobelelo. 16 Kwitila nunse, tolazi ngabo za bukatizio buno muvwame kuzimia misungu insania zili na keiya za wozo mubi; 17 vwalazi nkumbu za lonio, nu mwene wa Muuza Wasililila u idagi lya Kalaga. 18 Segazi na komanizia mu Muuza Wasililila mu nkungu insania nu ku nkita insania za masego. Kesiazi ntende ku bibyo gamozi na kusegela baswagibwa bansania bindi binsania. 19 Nsegelazi buno nikaswe lwatu, nilimbule kanua kane nu nisambale na bupuka keinda ka Musagu Musoga, 20 kugo nili musingwa mu kikando; nsegelazi buno nigusambale na bupuka anga bunatunganana kugusambala.
Kusambizania Kuzinda
21 Tikiko, mutundwa weitu nu mukiti mukatizia, mu mulimo wa Mukota, amusambalile misagu zane insania, buno mumenye bunili kuno. 22 Ku bubuno namusinga kumuli buno mungwe ku misagu zeitu, nu we abobelezie mitima zeinyu.