Kulama mu Kyengi
5
1 Umpanga mube bayangi ba Kalaga anga bana batundwa; 2 nu mutabange mu lutundo, anga bwatutundile Kristo, nu eikasenne wenyene ku kabamba keitu kuba lukaso nu kisansa kya nsunu nsoga ku Kalaga. 3 Tondo butazi, aba nsese insania, aba kutonia tabitekulwe nunse munkatini mweinyu anga bwatananina ku basililila, 4 aba bitondo bya nsoni, aba bya bukongolo, aba bitondo bya nguza bitaswaga, bitondo bibino tabyakulungana kutekulwa mumuli, tondo bitondo bya kusima. 5 Kubuno mwizi nunse buno takuli muntu wa nsese, aba ukutonia, u mukumbamizi wa nkisi, ukapiena bukota bwa Kristo nu bwa Kalaga.
6 Muntu wampa ntamwengelele na bitondo bya buliabulia kubuno ku kabamba ka bitondo bibino, bongoa bwa Kalaga bwabasile ku babo bana bakunana. 7 Umpanga tamugomie nabo; 8 kubuno wakalazi mwabezaga kapilo, tondo kano kaluma museli kyengi mu Mukota, tabangazi anga bana ba kyengi. 9 (Kubuno kiguma kya kyengi kili busoga, kwisanana nu bulili). 10 Lindikazi buni bunatananizia Mukota. 11 Nu tamugomie na makitilo ma kapilo matakukolama biguma, tondo mumazugile nunse. 12 Kubuno buli nsoni kutenda bitondo bibakukita mu lumbisombiso. 13 Tondo bibyo bitondo binsania bikumonekako bikulolesibwa na kyengi, 14 kubuno kikyo kikulolesia nti kili kyengi. Ku kabamba kako kwabwidwe bunee:
“Yuka uwe wiyombeka,
Uyuke kutuka ku bakuzi,
Nu Kristo akukase kyengi.” a
15 Umpanga, lolazi nunse lukita lumukutabanga mulo ta anga bantu bikongolo, tondo anga bantu beli na menge. 16 Kitazi mulimo musoga nkungu insania zimuli nazo kubuno bindi bibino bili bibi. 17 Ku bubuno, tamube bikongolo, tondo mumenyinine buni buli lutundo lwa Mukota.
18 Nu tamukue na maku, mumo muli kazege, tondo mwizazibwe na Muuza Wasililila. 19 Mutendane bweinyubweinyu mu nimbo zimbaga baYuda mu nimbo za kuganuna, nu mu nimbo za Muuza, mwimbe nu muganune nunse Mukota mu mitima zeinyu; 20 musime Kalaga Tateiswe mu nkungu insania ku bitondo binsania mu izina lya Mukota weitu Yesu Kristo.
Bakikulu nu Beiba Babo
21 Mwisigulizanie bweinyubweinyu mu boba bwa Kristo.
22 Inyuwe bakikulu, isiguliziazi ku beiba beinyu, anga bumukwisigulizia ku Mukota. 23 Kubuno wamulume eli itoe lya mukikulu wage, anga buli nu we Kristo itoe lya kanisa, eli Monia wa mubili. 24 Tondo anga bubo bukwisigulizia kanisa ku Kristo, u bubo bwatunganana kuba bakikulu ku beiba babo mu bitondo binsania.
25 Inyuwe beiba, tundazi bakikulu beinyu, anga bubo bwatundile Kristo kanisa, nu eikasenne wenyene ku kabamba kako. 26 Buno akaswagie nu kukengia mu mazi m'idagi, 27 buno eidusizie wenyene kanisa ka lutanuno, keteli n'itondoki, aba kusununana, aba kingo kitondo kili anga bubuno, tondo kasililila nu keteli na kisimboa. 28 Bubo nu bo, bamulume batunganana kutunda bakikulu babo anga mibili zabo bobenyene. Wozo watunda mukikulu wage nti eitunda we wenyene. 29 Kubuno takuli muntu wampa unasomba mubili wage we wenyene, tondo akugulisia nu kugukunga anga bubo bukukunga Kristo kanisa, 30 kubuno iswe tuli biganza bya mubili wage. 31 Ku kabamba kakano wamulume akasiga isi nu nina nu akalandana na mukikulu wage; nu bobabili babe mubili umozi. b 32 kakungu kakano keli kanene; tondo nkutenda bubo ku kitondo kya Kristo nu kanisa. 33 Tondo na muntu na muntu wa kumuli atunde mukikulu wage anga bweitunda wenyene, nu mukikulu nteide kwanza iba wage.