Mubili Umozi
4
1 Umpanga nne mukandwa mu Mukota, nkumusengezia nunse buno mutabange mu lukita lusoga lunatananizia mubila u mwamaninwe mugo, 2 mu kwisigulizia kunsania nu kwibotya gamozi na kusigililana nu kwikalilana bweinyubweinyu mu lutundo, 3 nu kwikokomezia kulanga kuba umozi mu Muuza, mu mugomio wa bubobelelo. 4 Kuli mubili umozi, nu Muuza umozi, anga bumwamaninwe ku kilemanizio kimozi kya mubila weinyu. 5 Kuli Mukota umozi, bukatizio bumozi, lututiko lumozi, 6 Kalaga umozi nu Isi wa bansania uli gantata ga bansania, nu munkatini mwa bansania nu mu binsania. 7 Tondo na muntu na muntu wa kutuli zakasilwe mponga anga geigezye kilindiko kya lukaso lwa Kristo. 8 Ku bubuno kwatendilwe bunee:
“Gaabakamine kwigulu,
Alusizie bakandwa nu
Akasenne nkaso ku bantu.”
9 Bwisulilwa bukizi bwa kitondo kikino: “Abakamine kwigulu.” Ndi ta buno alingile kugela mu biziki bya kunsi kwa kisi? 10 Wozo wagelile u wozo lingo wabakamine kutinga meigulu mansania, buno eizazie binsania. 11 Nu We abikile bamozi buno babe basingwa, nu bango babe balengania, nu bango babe basambazi ba Musagu Musoga nu bango babe balangi nu basozi. 12 Ku kusililizia kwa basililila mu mulimo wa kwigisia, nu kulindia mubili wa Kristo. 13 Aaba nu iswe tubansania twabe umozi mu bukatizio nu ku kumenyinina nunse Mwana wa Kalaga, nu kuba bakulu banene, nu kuba na kima kyasililila mu Kristo. 14 Umpanga tatube lingo anga bana bakuzangibwazangibwa, nu kwekwa na myuza insania za meigisia ma bwengelezi bwa bantu nu ku menge mabo bakugalukya bango mu nkita mbi. 15 Tondo ku kusambala bulili mu lutundo buno tukule mu bitondo binsania mu wozo uli itoe u Kristo. 16 Mu wozo, mubili unsania ukukulumanibwa nu kugugumana gamozi, nu kukula ku bukasia bwa ngiginyo insania zigukeite anga magala mabeganibwa ku kiganza na kiganza buno widindie mu lutundo.
Kalamo Kato mu Kristo
17 Umpanga bubuno u bunkutenda nu kulongeka mu Mukota buno tatwatunganana kwenda lingo anga bukwenda baBilongo mu makengelo mabo ma buliabulia. 18 Menge mabo mabikilwe kapilo, babikilwe bulazi na kalamo ka Kalaga ku kabamba ka bukongolo mubeli, ku kabamba ka mitima zabo mibibu. 19 Bazimizizie makengelo mansania, beikasenne ku butazi, nu ku kukita lukita na lukita lwa nsese mu nduma.
20 Tondo inyuwe tamwigile Kristo bubo. 21 Ndi lebelebe mwamungwilide, nu mwigisibwa nage; anga bulili buli mu Yesu, 22 umpanga sigazi kukita misako zeinyu za wakalazi nu tikyazi muntu wa bumba bukulu bwa bwagi ukubiga ku kuyanga ntundo mbi za bwengelezi; 23 mube bato mu muuza wa bumenyinino bweinyu, 24 muvwale muntu muto wabumbilwe ku lukita lwa Kalaga mu kwisanana nu mu kusililila kukutuka ku bulili.
Bukatizio Bukugalukya Muntu mu Kalamo Kato
25 Ku bubuno, sigazi buza nu na muntu na muntu wa kumuli atende bulili ku munyage, kubuno beiswe tuli biganza, bweitubweitu. 26 Ongoazi, tondo tamwage; nu bongoa bweinyu tabwike ku igolo, 27 tamukase Satana kiziki.
28 Wozo wibile nteibe lingo, tondo akite mulimo musoga na maboko mage buno amone kaanakasa wozo ukwiyaninako. 29 Mu tunua tweinyu tamutuke bitondo bibi, umpanga bibyo bili bisoga binalindia bango anga bubakwiyanina nu kukasa mponga ku bakungwa kubyo. 30 Aba tamwitie Muuza Wasililila wa Kalaga na kabebe, kweli mwabikilwe kamenyikilo aaba nu kubasa ku busi bwa bukuluzi. 31 Kangonongono kansania, nu bukali bunsania, bongoa bunsania, mulubu unsania, bilingano binsania nu bitondo binsania bibi bituke munkatini mweinyu. 32 Mube na mponga nu kyombo bweinyubweinyu nu musigililane bweinyubweinyu anga bwamusigilide Kalaga mu Kristo.