Mulimo wa Paulo ku BaBilongo
3
1 Ku bubuno, nne Paulo mukandwa wa Yesu Kristo, nakandwa ku kabamba keinyu inyuwe baBilongo. 2 Ndi mungule ku musagu wa mponga zinakasilwe na Kalaga ku kabamba keinyu; 3 buno ku kulolesibwa namenyesizibwe keinda kakano kanasanzile ku bitondo bikeke. 4 Nu mu nkungu zimukubisoma munavwama kumenyinina bumenyinino bwane bunili nabo mu keinda ka Kristo. 5 Keinda kakano takamenyesizibwe wakalazi ku bana ba bantu ba bingo bibuti anga bukalolesizibwe kano kaluma na Muuza Wasililila ku basingwa basililila ba Kalaga, nu ku balengania. 6 Keinda kakano keli buno, mu Musagu Musoga, baBilongo beli bapieni gamozi na baYuda nu beli biganza bya mubili umozi nu beli mu idagano lilyo lili mu Yesu Kristo. 7 Nabikilwe mukiti wa wono Musagu Musoga anga lukaso lwa mponga za Kalaga zinakasilwe ku kukita kwa magala mage. 8 Kundi nne uli mukeke ku basililila bansania, nakasilwe mponga zeno za kusambalila baBilongo bugumi bwa Kristo butanalindikwa na bungo. 9 Nu kulolesia bantu bansania bubanasongolola bwasibwasi nkiko za keinda kabisilwe kutukila wakalazi mu Kalaga wabumbile binsania, 10 buno makota nu bwangato bwa biziki bya mwigulu bamenye kano kaluma menge ma Kalaga ma nkita na nkita mu nzila za Kanisa. 11 Anga buli bulongeki bwage butanakuzinda bwakitile mu Yesu Kristo Mukota weitu, 12 mweli, mu bukatizio bwage, tuli na bwangato kuvwa bwigi na Kalaga na kilemanizio kinsania. 13 Ububo, nkumusega buno tamukutwe ku kabamba ka mbabazio zinkumubabalilwa, buli lutanuno lweinyu.
Lutundo lwa Kristo
14 Ku kabamba ka bitondo bibino, nakoma mazu mane lwabusio lw'Isi wa Mukota weitu, Yesu Kristo. 15 Mweli kikanga kinsania kya mwigulu nu kya mu kisi kyinikwa izina. 16 Buno amukase anga buli bunene bwa lutanuno lwage mube na magala mu Muuza wage mu muntu wa munda, 17 buno Kristo eikale mu mitima zeinyu ku bukatizio, buno mulindibwe nu kukokomezibwa mu lutundo, 18 buno mumenyinine gamozi na basililila bansania buni buli bungulu, bulazi, buzindu nu kusakama kwa lutundo lwa Kristo, 19 nu kusongolola lutundo lwa Kristo, buno lwatinga bumenyinino bunsania nu muzindilizibwe ku kuzindilila kunsania kwa Kalaga.