Konibwa ku Mponga
2
1 Nu inyuwe mwabezaga bakuzi ku kabamba ka mibili zeinyu nu ka bwagi bweinyu, 2 zezo zimwatabangaga muzo wakalazi ku kuyanga lukita lwa kisi kikino nu ku kuyanga mukota wa magala ma mpelela, wozo muuza wa bwengelezi ukukita mulimo kano kaluma mu babo banani. 3 Nu iswe tubansania twabezaga ba ku babo nu twalamaga wakalazi mu ntundo za mibili zeitu nu za makengelo meitu nu ku bumba twabezaga bana ba kuzugilwa nunse anga bango. 4 Tondo Kalaga uli mugumi nu mwiya kyombo kinene, ku kabamba ka lutundo lwage lunene lwatutundile, 5 aba nkungu zezo zitwabezaga bakuzi ku kabamba ka mibi zeitu atulamizie gamozi na Kristo, (ku mponga u ku mwonezibwe). 6 Nu Kalaga atuyukizie gamozi na Kristo nu atwikazizie gamozi nage Mwigulu mu Yesu Kristo, 7 buno mu nkiko zavwe, alolesie bunene bwa mponga zage butanavwama kuganzwa nu busoga bwage kutuli mu Yesu Kristo. 8 Kubuno ku mponga mwonezibwe, ku bukatizio, nu bubo tabwatukile kumuli mubenyene, buli lukaso lwa Kalaga, 9 ta ku makitilo masoga, muntu unsania anavwa kwikaka. 10 Kubuno iswe tuli mulimo wa Kalaga, twabumbilwe mu Yesu Kristo, buno tukite makitilo masoga mamo malingile kulongeka Kalaga lwabusio buno tumayange.
Kuba Umozi mu Yesu Kristo
11 Ku bubuno kengelazi buno wakalazi mwabezaga ba Bilongo mu mubili; mwamanagwa buno batamonesibwa, na babo beimanaga buno bamonesibwa, (nu beli bubo mu mubili nu bakubukitwa na maboko ma bantu). 12 Kengelazi buno mu nkungu zezo, tamwabezaga na Kristo, mwabezaga mwalekanukibwa na kilongo kya baIsraeli, nu mwabezaga bageni ku nango z'idagano, tamwabezaga na kilemanizio, nu tamwabezaga na Kalaga mu kisi. 13 Tondo kano kaluma, mu Yesu Kristo, beinyuwe babezaga bulazi wakalazi, museli bwigi mu mikila za Kristo. 14 Kubuno wozo eli bubobelelo bweitu, we watukitile iswe babezaga babili kuba umozi nu endwide kitutu kya bwiti kyabezaga gatusamba, 15 mu mubili wage asilile kutikya bubo bwiti, u mulembe gamozi na makakizio mago. Atundaga kukita babano babili kuba muntu umozi muto nu kubika bubobelelo; 16 nu akulumanizie babo babili gamozi na Kalaga, mu mubili umozi ku musalaba nu kwita bubo bwiti kugo. 17 Avule kusambala bubobelelo ku beinyuwe babezaga bulazi, nu ku babo babezaga bwigi, 18 kubuno mweli beiswe bansania, tuseli na nzila za kwitabizibwa n'Isi mu Muuza umozi.
19 Umpanga tamuli lingo bageni aba batingi, tondo muli banyabo na baswagibwa, bantu ba numba za Kalaga. 20 Mobakilwe gantata ga kibanza kya basingwa nu balengania; Yesu Kristo wenyene eli ikozi inene lya kapindapinda. 21 Mweli lobako lunsania lwakulumanibwa busoga, nu kukula buno lube numba zasililila za kukumbamina Mukota. 22 Mweli nu inyuwe mukobakwa gamozi buno mube kiziki kya kwikala kya Kalaga mu Muuza.