Kukasana Lukaso ku Mibuto
16
1 Ku kitondo kya kukundamania mitebe ku kabamba ka basililila, anga bunakakizizie makanisa ma ku Galatia nu inyuwe mukite bubo. 2 Na busi butangi bw'izinga na muntu na muntu kumuli atunganana kubika bikulo anga geigezye bikulo byeli nabyo, aba tamulindile kukundamania mitebe zeinyu ku Yerusalema aaba kuvwa kwane; 3 Nu nne ganabase, nasinge babo bamwasombole na mikanda, beeke mitebe zeinyu ku Yerusalema: 4 nu ndi bwakulungana nu nne kwendako, nti bende gamozi na nne. 5 Tondo navwe kweinyu ganabe natinga ku Makedonia; kubuno nasoke ku Makedonia, 6 embe nikale kweinyu, aba embe nikale kakeke kuko mu nkungu insania za mpego, buno munsindikizie ku lugendo lwane kunsania kunkwenda. 7 Kubuno kano kaluma, nsikutunda namumoneko mu kutinga tugu; tondo nkulemanina kwikala kweinyukweinyu nkungu nkeke, ndi Mukota atunda.
8 Tondo nikale mu Efeso aaba nu kubasa ku busi bwa Pentekoste. 9 Kubuno nigulilwa lwibi lunene ku kukita mulimo watananina nunse, tondo basombi beli beingi.
10 Tondo ndi Timoteo abasa, nti mwamusekela busoga bwaneikala munkatini mweinyu geteli boba, kubuno akukitaga mulimo wa Mukota, anga bunkukitaga nu nne. 11 Umpanga muntu unsania ntamubenge, tondo mumwane nzila na bubobelelo, bwanasubya lingo kundi, kubuno nne nkumulindila, we gamozi n'engo mibuto zeitu.
12 Tondo ku kitondo kya Apolo, mubuto weitu, namusegile nunse mambizi meingi buno ende kweinyu na mibuto zeitu, tondo we ntatundile nunsania kwenda kano kaluma, tondo ende gaamone nkungu za kwenda.
13 Kesiazi ntende, lindazi mu bukatizio, mube bamulume, ikokomeziazi. 14 Bitondo byeinyu binsania bikitwe mu lutundo!
15 Kano kaluma nkumukakizia nunse, mibuto zane, (mwizi buno kikanga kya Stefano, beli bantu batangi kukatizia ku kisi kya Akaya, nu bo beibikile mu mulimo wa kukitila basililila), 16 umpanga anzazi bantu anga babo, nu na muntu na muntu ukukitaga mulimo na magala gamozi nabo.
17 Nu nne nkubogaboga ku kuvwa kwa Stefano nu Fortunato nu Akaiko, kubuno babano bankasile bunidile kumuli gamutabezagako. 18 Umpanga kutyazi bantu anga babano kubuno balindizie mutima wane nu weinyu. 19 Makanisa ma ku Asia mamusambizia. Akila nu Prisila bamusambizia nunse mu Mukota gamozi na kanisa kakundamana mu numba zabo. 20 Mibuto zeitu insania zamusambizia. Sambizaniazi bweinyubweinyu na mbogimbogi.
21 Zezo zili samba zane, nne Paulo, u wasanza.
22 Ndi muntu unsania ntakwelama Mukota, aswililwe! Maranatha! (Mukota, uvwe!)