Lukuo lwa Yesu nu Kuyuka Kwage Kutuka ku Bakuzi
15
1 Mibuto zane, nkumukengelezia Musagu Musoga u namusambalide, wozo u mwakatizizie nu u mwemana mugo, 2 nu monibwa kugo, ndi mwagukokomezia nunse mu idagi linamusambalide; ndi ta bubo kasi nti mwakatizizie buliabulia. 3 Kubuno nalingile tanga kumusambalila nnenyene bitondo binsania binakatile buno Kristo akule ku kabamba ka bwagi bweitu anga bukutenda masanzo; 4 nu ayikilwe, nu ayukizibwe kutuka ku bakuzi kusila kwa bindi bisatu, anga bukutenda masanzo; 5 nu amonekileko na Kefa, nu na babo ikumi nu babili. 6 Kusila kwa bubo amonekileko na mibuto kutinga nkama itano gamozi, beingi beikiligo nu bamozi bese bakua. 7 Kusila kwa bubo amonekileko na Yakobo, nu na basingwa bansania.
8 Nu kumbusa kwa bansania, namumonineko anga muntu wabutilwe nu nkungu zage tazikuka. 9 Kubuno nne nili mukeke nunse mu basingwa, nsyatunganana kumanwa musingwa, kubuno nasungizie Kanisa ka Kalaga. 10 Tondo ku mponga za Kalaga nili buno bundi, nu mponga zage kundi tazabezaga buliabulia, tondo nitide nunse kukita mulimo kutinga babo bansania, aba ta nne, tondo mponga za Kalaga zabezaga gamozi na nne. 11 Umpanga ndi nne, aba babo, ububo butukusambala nu bubo bumwakatizizie nu inyuwe.
Kuyuka kwa Yesu Kutuka ku Bakuzi Kuli Kalolesio ka Bantu Bage
12 Umpanga ndi mwasambalidwe buno Kristo ayukizibwe kutuka ku bakuzi, kubuni bamozi kumuli bakutenda buno takuli iyukilo lya bakuzi? 13 Tondo ndi takuli iyukilo lya bakuzi, kasi nti Kristo nu We ntayukizibwe; 14 nu ndi Kristo ntayukizibwe, kasi kusambala kweitu kuli buliabulia, nu bukatizio bweitu buli buliabulia. 15 Nu lebelebe, iswe nti tuli anga bakwekela Kalaga buza; kubuno twalongekede Kalaga buno ayukizie Kristo kutuka ku bakuzi; tondo ntamuyukizie, ndi lebelebe bakuzi tabakuyukibwa. 16 Kubuno ndi bakuzi tabakuyukibwa; kasi, Kristo nu We ntayukizibwe. 17 Nu ndi Kristo ntayukizibwe, kasi bukatizio bweinyu nti buli buliabulia; kasi, mukikili mu bwagi bweinyu. 18 Nu babo bakule mu Kristo, kasi nti baziminne. 19 Ndi mu kalamo kakano tugu u mutuli na kilemanizio mu Kristo, iswe tuli bantu beli na tubebe kutinga bantu bansania.
20 Tondo kano kaluma Kristo ayukizibwe kutuka ku bakuzi, nu abede mutangi wa babo bakule. 21 Kubuno anga bubo lukuo lwalusizibwe na muntu umozi, ububo nu bo iyukilo lya bakuzi lyalusizibwe na muntu umozi. 22 Kubuno anga mu Adamu bansania bakukuaga, ububo nu bo mu Kristo bansania bakalamibwa. 23 Tondo na muntu na muntu ku kiziki na kiziki kyage; Kristo eli mutangi; kumbusa kwage babo beli ba Kristo, ku kuvwa kwage. 24 Nu kusila kwa bubo kuli kuzinda, gaakakasana Bukota ku Kalaga Isi; gabe asila kuzikya bukota bunsania nu bwangato bunsania nu magala mansania. 25 Kubuno We atunganana kwangata aaba nu gaakabika beiti bage bansania kunsi kwa magulu mage. 26 Mwiti muzinda kuzikibwa eli lukuo. 27 Kubuno Kalaga abikile binsania kunsi kwa magulu mage. Mukutenda buno, abikile binsania kunsi kwa magulu mage, nti buligo nunse buno ntakutenda ku Kalaga wenyene u wabikile binsania kunsi kwa magulu ma Kristo. 28 Nu kungwa angatile binsania, ububo Mwana wenyene nti akangatwa nage, wozo wabikile binsania kunsi kwa magulu mage buno Kalaga abe binsania mu bansania.
29 Babo batutikwa ku kabamba ka bakuzi bakite buni? Ndi bakuzi tabakuyukibwa nunse? Kubuni bubakututikwa ku kabamba ka bakuzi? 30 Nu iswe kubuni butukusungibwa nkungu na nkungu? 31 Mibuto zane, na busi na busi nkukengela buno nakule, tondo nkwikaka mumuli buno mwakatizizie Kristo Yesu Mukota weitu. 32 Ndi ku lukita lwa bantu, u kunitenne na nyama nkali ku Efeso, nti nili na mutali mukizi? Ndi bakuzi tabakuyukaga, kasi tuliazi nu tunuazi, kubuno lubi twakue.
33 Tamwiyengelele, mugomio mubi ukubigia misako misoga. 34 Yukazi mu menge meisanana, tamukite lingo bwagi; kubuno bamozi tabeli na bumenyinino bwa Kalaga: nkutenda bubo buno mukue na nsoni.
Bakuzi Bakayuka Buni?
35 Tondo embe muntu umozi anabuzia buno, buni bukuyukaga bakuzi? Nu mubili mukizi u bakuvwaga nago? 36 Makengelo mobe meli bukongolo! Mbuto ziukuyikaga tazikwasaga ndi tazalinga tanga kubola, 37 nuzo ziukuyikaga, ntukuziyikaga na mubili ukazitubula nago lingo, umpanga kaguma tugu, embe ka ngano, embe k'engo nkita; 38 tondo Kalaga akuzikasaga lukita, anga bwakutunda, nu na mbuto na mbuto na lwage lukita.
39 Misuna insania tazili bumozi; tondo emozi zili misuna za bantu, nu engo zili za nyama, nu engo za byena, nu engo za tuzoni.
40 Kuli mibili za mwigulu, nu mibili za mu kisi; tondo kusana kwa zezo za mwigulu kuli bwebwe, nu kusana kwa zezo za mu kisi kuli bwebwe. 41 Kuli kusana kumozi kwa kisongo kya busi, nu kungo kusana kwa mwezi, nu kungo kusana kwa nkeninkeni; kubuno lukenikeni lumozi lwengukana na lungo lukenikeni ku kusana.
42 Bubo u buli iyukilo lya bakuzi. Mubili ukuyikwa nu kubola, nu nti ukayukibwa mu mubili uteli wa kubola; 43 ukuyikwa na kubengwa, ukayukibwa na lutanuno; ukuyikwa watamba, ukayukibwa na magala, 44 ukuyikwa na mubili wa bumba bwa bwagi, nu ukuyukibwa mu mubili wa muuza. Kuli mubili wa bumba bwa bwagi nu kuli mubili wa muuza. 45 Ububo bwasanzilwe bunee: “Muntu mutangi Adamu abede mulami, Adamu muzinda abede muuza wa kukasana kalamo.” 46 Tondo wozo wa Muuza ta mutangi, tondo wa bumba; nu kumbusa u kwavwa wozo wa Muuza. 47 Muntu mutangi eli wa kisi, atukile ku bilongo; Muntu wa babili eli Mukota watukile mwigulu. 48 Bubo bweli wa bilongo, ububo nu bo babo beli ba bilongo, nu anga buli wozo wa mwigulu, ububo nu bo babo beli ba mwigulu. 49 Nu anga butwekile kisusania kya wozo wa bilongo, ububo nu bo butukeeka kisusania kya wozo wa mwigulu.
Yesu Atukindide Lukuo
50 Tondo bubuno u bunkutenda, mibuto zane, buno mibili za bumba nu mikila tazinapiena bukota bwa Kalaga, aba kyakubola takinapiena kitanabola.
51 Ungwililazi, nkumulolesia keinda: Tatukeiyombeka beiswe bansania, tondo iswe tubansania tukagalukibwa, 52 ku kazanga kamozi, ku kukebya kwa liso, nkungu za monze wa kuzinda. Kubuno monze ukidwa, nu bakuzi bakayukibwa geteli kubola lingo, nu iswe tukagalukibwa. 53 Kubuno wono mubili wa kubola watunganana kuvwala mubili utanabola, nu wono ukukua watunganana kuvwala utanakua. 54 Ububo wono wa kubola ukavwala wozo utanabola, nu wono wa kukua kuvwala wozo utanakua, ku zezo nkungu, likazindilila lilyo idagi lyasanzilwe bunee: “Lukuo lwameninwe mu kukinda. a 55 Ee lukuo, kuni kuli kukinda kwobe? Ee lukuo, kuni kuli mutabo wobe?” 56 Magala ma lukuo meli bwagi, nu magala ma bwagi meli mulembe. 57 Tondo, tusimazi Kalaga, ukutukasaga kukinda mu Mukota weitu, Yesu Kristo!
58 Umpanga, mibuto zane batundwa, mulinde, tamutengetenge, mwitile nunse kukita mulimo wa Mukota bindi binsania, mumenye buno mulimo weinyu taguli buliabulia mu Mukota.