Bitondo Bito bya Nkaso za Muuza Wasililila
14
1 Londazi lutundo, nu lingo mube na mpusia nunse za nkaso za Muuza Wasililila, tondo kwitila nunse, lulo lwa bulengania. 2 Kubuno wozo ukutenda ku mutendezi, nti ntakutenda ku bantu, tondo akutenda na Kalaga; kubuno takuli muntu ukungwa byakutenda, tondo akutenda bitondo bya twinda mu mutima. 3 Tondo wozo ukulengania, akutenda na bantu bitondo bya kubobaka nu kubagugumania nu kubabobelezia. 4 Wozo ukutenda ku mutendezi akwiyobaka we wenyene; tondo wozo ukulengania, akobaka kanisa. 5 Nne nkutunda inyuwe bansania mutende ku mitendezi, tondo kutinga nunse, mulenganie, kubuno wozo ukulengania eli munene kutinga wozo ukutenda ku mutendezi ndi nteisula, buno kanisa kobakwe. 6 Tondo mibuto zane, ndi navwa kumuli nu kutenda ku mitendezi zimuteizi, nti mwabe na mutali mukizi, kungwa nsyavwa kumuli na kalolesio, aba bumenyinino, aba bulengania, aba meigisia?
7 Aba binsania biteli na kalamo bili n'iyuki, ndi monze, aba nzenze, ndi tabikubasia moki ma bwisulilwa, buni bunamenyininwa nimbo zikwimbwa na kapyelele aba na nzenze? 8 Nu ndi monze zikubasia iyuki litakumenywa, nazi unasanga wikunina bita? 9 Ububo nu inyuwe, ndi ndami zeinyu tazikutenda bitondo bikungubwa, buni bwamenywe bubo bwatendagwa? Kubuno muli anga bakutenda buliabulia. 10 Kuli mitendezi za nkita ningi mu kisi, tondo takuli umozi geteli bwisulilwa. 11 Umpanga ndi nsyamenya bwisulilwa bwa wozo mutendezi, nti nabe anga mugeni ku wozo muntu ukutenda, nu we abe anga bubo kundi. 12 Ububo nu inyuwe, kubuno muli na lutundo nunse lwa nkaso za Muuza, londazi kuba nazo nunse buno mobake kanisa.
13 Ku bubuno, wozo ukutenda ku mutendezi asege bwanaba na lukaso lwa kwisula. 14 Kubuno ndi nkusega ku mutendezi, nti mutima wane ukusega, tondo menge mane tameli na mutali. 15 Umpanga buni bunikita? Nasege mu mutima wane, nu lingo nasege na bumenyinino; nimbe mu mutima, nu lingo nimbe na bumenyinino. 16 Kubuno uwe ndi ukuganuna mu mutima, wozo uteizi buukutenda buni bwaneitabizia “Amena!” ku kuganuna kobe, kubuno nteizi buukutenda? 17 Kubuno buligo buno uwe ukuganuna busoga, tondo wozo ungo ntakulindibwa.
18 Nkuganuna Kalaga, ku bubo bunkutenda ku mitendezi kutinga inyuwe bansania, 19 tondo ninatunda nunse kutenda moki matano mu kanisa na bumenyinino, buno nigisie bango, kutinga kutenda moki tununu ikumi (10.000) ku mutendezi.
20 Mibuto zane, tamube anga bana mu bumenyinino bweinyu, tondo ku bwagi mube bana, nu mu bumenyinino bweinyu mube bakulu banene. 21 Bwansanzilwe mu mulembe bunee: “Nkatenda na bantu babano ku ingo mitendezi nu ku tunua twa bageni; natende ku bantu babano; nu aba bubo, tabakanungwa nunse,” u bwatendile Mukota Kalaga. a 22 Ku bubuno, mitendezi zili kalolesio, ta ku bakatizia, tondo ku babo batakatizia; tondo bulengania buli kalolesio, ta ku babo bakatizia, tondo ku babo batakatizia.
23 Ndi kanisa kansania kakundamana nu bansania bakutenda ku mitendezi, nu kungwa kwingila bango bantu bateizi wozo mutendezi, aba bango bantu batakatizia, ndi tabanatenda buno muli misile? 24 Tondo ndi bansania bakulengania, nu ndi kwingila muntu utakatizia aba uteizi, nti asongolola bwagi bwage ku bansania nu nti abezibwa na bansania; 25 nu bitondo byabezaga abisa mu mutima wage nti byamenywa; nu bubo nti agoe bukukama nu akumbamine Kalaga, nu nti atende bunee: “Buligo nunse buno Kalaga eli gamozi n'inyuwe.”
Paulo Akubakengelezia Bubakite Misanganano Zabo
26 Umpanga, mibuto zane, buni bututende? Gamukukundamana, ndi na muntu na muntu mumuli eli na lwimbo, nu meigisia, nu kalolesio, nu mutendezi, nu bwisulilwa, bitondo binsania bikitwe buno byobake. 27 Ndi muntu akutenda ku mutendezi, batende babili, aba tabatinge bantu basatu, batende umozi umozi; nu ungo nti eisule: 28 tondo ndi takuli umozi wa kwisula, nti eikale kibibi mu kanisa; atende na mutima wage wenyene ku Kalaga. 29 Nu balengania batende babili aba basatu, nu bango nti bamenyinina busoga. 30 Tondo ndi ungo wikala bwigi nage akulolesibwa kalolesio, nti wozo mutangi eikala kibibi. 31 Kubuno inyuwe bansania munavwama kulengania, umozi umozi, buno bansania beigisibwe nu bansania balindibwe; 32 nu myuza za balengania zikwanza balengania; 33 kubuno Kalaga ta Kalaga wa mulubu, tondo wa bubobelelo.
Anga mu makanisa mansania ma basililila, 34 bakikulu beikale kibibi mu makanisa, kubuno tabeli na bwangato bwa kutenda; tondo banze, anga bubo bukutenda mulembe. 35 Nu ndi bakutunda kwigisibwa kitondo kisiembe, nti babuzia beiba babo bobenyene mu numba zabo, kubuno buli nsoni bakikulu kutenda mu kanisa.
36 Kikizi? Idagi lya Kalaga ndi lyatukile kweinyu? Aba ndi lyamubaside inyuwe mubenyene? 37 Ndi muntu umozi akukengela buno eli mulengania, aba eli muntu wa Muuza wa Kalaga, amenyinine buno bitondo bibino binamusanzila bili ikakizio lya Kalaga. 38 Tondo ndi muntu nteizi bitondo bibino, kasi nti abe muntu uteizi.