Paulo Ntakukengela Bitondo bya Kisi
2
1 Mibuto zane, ganavule kumusambalila bulongeki bwa Kalaga, nsyavule na moki ma kumutananizia, aba nu menge makali, 2 kubuno nsyakengede kingo kitondo munkatini mweinyu, umpanga Yesu Kristo, nu We eitilwe ku musalaba. 3 Nu nne ganabezaga kweinyu, nabezaga natamba, nu nabezaga na boba, nu nagiliminaga. 4 Nu kutenda kwane nu kusambala kwane takwabezaga ku moki ma kuluta bantu na menge, tondo ku kulolesia kwa Muuza nu kwa magala, 5 buno bukatizio bweinyu tabube mu menge ma bantu, tondo mu magala ma Kalaga. Muuza Wasililila Akwigisia Bantu Menge ma Kalaga
6 Tukutendaga na menge ku babo bese bakula mu Kristo: tondo ta menge ma nkiko zeno, aba ma bangati ba nkiko zeno, nu bo u bakukegibwa. 7 Tondo tukusambala menge ma keinda ka Kalaga, menge mabisilwe ku bantu, nu mabikilwe na Kalaga ku lutanuno lweitu, lwabusio lwa kubumbwa kwa kisi. 8 Takuli aba mwangati umozi wa nkiko zeno wamenyine menge mamano. Kubuno songo bamamenyine, songo tabanitile Mukota wa lutanuno ku musalaba. 9 Tondo anga bwasanzilwe bunee:
“Takuli liso lyamonine,
Aba kutuzi kungule,
Aba tabyingide ku mutima wa muntu,
Bitondo bibyo byalongekile Kalaga ku babo bakumutunda.” a
10 Tondo Kalaga abilolesizie kutuli ku nzila za Muuza wage. Kubuno Muuza akulonda bitondo binsania, aba makengelo mabisama ma Kalaga. 11 Kubuno nazi muntu unamenya makengelo ma muntu, ndi ta umpanga muuza wa muntu guli mweli? Ububo nu bo ku makengelo ma Kalaga, takuli muntu ukumamenya, umpanga Muuza wa Kalaga. 12 Tondo beiswe tatwakatile muuza wa kisi kikino, tondo wozo Muuza ukutukaga ku Kalaga, buno tumenye bitondo bitwakasilwe buliabulia na Kalaga ku mponga zage. 13 Nubyo u bitukutendaga, ta ku moki matwigisizibwe na menge ma bantu, tondo matwigisizibwe na Muuza: ku kulingimania bitondo bya bulili bya Muuza nu moki ma Muuza.
14 Tondo muntu uteli na Muuza wa Kalaga, ntakwitabizia bitondo bikutuka ku Muuza wa Kalaga, kubuno, bili bukongolo kweli, aba ntanavwama kubimenya, kubuno bikumenyininwa tugu na Muuza Wasililila. 15 Tondo muntu wagomia na Muuza akusongolola bitondo binsania, tondo we Wenyene ntakumenyininwa na muntu wampa. 16 Kubuno nazi wamenyine makengelo ma Mukota, buno amwigisie? b Tondo iswe tuli na makengelo ma Kristo.