Paulo Akubamana Bana ku Kabamba ka Kwidekanukya Kwabo
3
1 Mibuto zane, nsyavwamine kutenda n'inyu anga bantu bagomia na Muuza, tondo anga bantu ba mubili, anga bana bakeke mu Kristo. 2 Namumomezie mabele, nu nsyamulisizie idia ibibu, kubuno mwabezaga tamukulivwama: aaba nu kano kaluma tamukulivwama, 3 kubuno inyuwe mukili bantu ba mubili; kubuno ndi mukili na lugi nu myango munkatini mweinyu, ndi tamwikile bantu ba mubili nu nti tamukukita anga bantu ba kisi tugu? 4 Kubuno ndi muntu umozi akutenda bunee: “Nne nili wa Paulo,” nu ungo buno, “Nne nili wa Apolo,” ndi tamukukita anga bantu bakuyanga mubili tugu? 5 Umpanga Apolo eli nazi? Nu Paulo eli nazi? Beli tugu bakiti ba Kalaga, mwakatizizie ku kabamba kabo, anga bwakasile Mukota ku muntu na muntu. 6 Nne nayikile mbuto nu Apolo asandide mazi, tondo Kalaga azasizie. 7 Ububo wozo ukuyika nteli kena, aba wozo ukusandilaga mazi nteli kena; tondo Kalaga ukuzasagia mbuto. 8 Wozo ukuyika nu wozo ukusandila mazi beli bumozi; tondo na muntu na muntu akakaswa lukalilo lugezie na mulimo wage wenyene. 9 Kubuno tuli bakiti ba mulimo gamozi na Kalaga: inyuwe muli isoa likwasibwa na Kalaga, nu numba zikobakwa na Kalaga.
Beigisibwa Beidange na Bubakukita
10 Ku mponga za Kalaga zinakasilwe, anga ngomba za kobaka, nabikile kibanza, nu ungo muntu akobaka gakyo. Tondo na muntu na muntu alole busoga lukita lwakobaka gakyo. 11 Kubuno takuli muntu unavwama kubika kingo kibanza kutinga kikino kyabikilwe kalazi, u Yesu Kristo. 12 Tondo ndi muntu obaka ga kibanza kikino na olo, aba na feza, aba na makozi ma bukunza bubibu, aba na miti, aba na nsolu zakama, aba na nsamba, 13 mulimo wa muntu na muntu gukamonekako, kubuno bubo busi bukagulolesia, kubuno gukabisulwa na keiya. Nu kako keiya kakalindika mulimo wa muntu na muntu buno guli wa lukita lukizi. 14 Ndi mulimo wa muntu wobakile ga kikyo kibanza wasigala, nti akakata lukalilo lusoga. 15 Ndi mulimo wa muntu wagia, nti akeida lukalilo lwage: tondo we wenyene nti akonibwa, tondo anga muntu ukona mu keiya.
16 Ndi tamwizi buno inyuwe muli numba za Kalaga, nu Muuza wa Kalaga akwikalaga mumuli? 17 Ndi muntu abigia numba za Kalaga, nti Kalaga akabigia muntu wozo; kubuno numba za Kalaga zasililila, u beinyuwe.
18 Muntu nteiyengelele we wenyene. Ndi muntu umozi kumuli akwikengela buno, eli na menge mu kisi kikino, nti aba kikongolo, buno abe na menge. 19 Kubuno menge ma kisi kikino meli bukongolo lwabusio lwa Kalaga. Kubuno bwasanzilwe bunee: “We u ukukungulaga beiya menge mu bwengelezi bwabo.” a 20 Nu lingo, “Mukota eizi makengelo ma beiya menge, buno meli buliabulia.” b 21 Umpanga muntu nteikake ku bantu. Kubuno binsania bili byeinyu; 22 ndi bya Paulo, aba bya Apolo, aba bya Kefa, aba bya kisi, aba bya kalamo, aba bya lukuo, aba bya kano kaluma, aba bikaba, binsania bili byeinyu. 23 Nu inyuwe muli ba Kristo, nu Kristo eli wa Kalaga.